VOV4.K’ho- Ngai 21/10, càr Kon Tum git gŏ 8 nă cau F0 tàm mpồl bơtiàn, geh 5 nă cau tàm dùl hìu bơnhă tàm thôn 5, xã Hà Mòn, kơnhoàl Đăk Hà mờ 3 nă kuang bàng, cau lơh sơnơm bơh Hìu sơnơm kơnhoàl Tu Mrông dê. Pal đơs là 3 nă kuang bàng, cau lơh sơnơm bơh hìu sơnơm kơnhoàl Tu Mrông dê geh sền gŏ bơtờp mờ virus Sars CoV-2 tŭ do ờ hềt git loh bơh lơi bơtờp kòp mờ ndrờm neh cit 2 ding sơnơm vaccine rơcang sơndră kòp Covid-19.

Kơnhoàl Đăk Hà lam lơh ală broă lơh rơcang sơndră kòp
Nàng rơcang sơndră kòp, UBND càr geh sră nggal jal mhar sồr lam lơh ală broă lơh rơcang sơndră kòp Covid-19. Mùl màl, càr Kon Tum sồr lam lơh đal git tiah gơ rềng tus cau kòp ing tàm uă tiah bơh ƀòn geh cau kòp dê nàng lam lơh ală broă lơh sền gròi kòp. Gơwèt mờ 4 kơnhoàl, ƀòn dờng geh cau kòp tàm mpồl bơtiàn geh Đăk Hà, Tu Mrông, Đăk Tô mờ ƀòn dờng Kon Tum, ală mpồl lơh broă geh gơ rềng lam lơh mơ broă đal git tiah geh kòp, xét nghiệm uă, tam cah is tiah geh kòp Covid-19 (geh tam cah is jat bă tiah dềt dilah pal lơh).
Cau mblàng K’Duẩn
Viết bình luận