VOV4.K’ho- Tềng đăp bơta gơbàn kal ke, ờ gơtùi gĭt lài bơh kòp Covid-19 dê, bơh ngai 10/5, Ủy ban Nhân dân càr Kon Tum sơnđờm ai kơnòm bơsram, cau bơsram dờng, cau bơsram in ơm rlô bơsram tơrgùm bal tàm hìu bơsram nàng rơcăng sơndră kòp.

Kơnòm bơsram, cau bơsram dờng càr Kon Tum sơn đờm ơm bơsram tơrgùm bal tàm hìu bơsram nàng rơcăng sơndră kòp Covid-19

Bal mờ broă geh kơrnoat lơh nền ai kơnòm bơsram, cau bơsram dờng, cau bơsram in ơm rlô bơsram tơrgùm bal tàm hìu bơsram, Ủy ban Nhân dân càr Kon Tum kung jàu Sở Giáo dục mờ Đào tạo in bơto pơlam ală hìu bơsram lam lơh jăt broă lơh bơto bơsram tơn tàm internet mờ bơsram wơl, bơsram is tàm hìu; pơlam tơn jơh nam bơsram 2020- 2021 dipal mờ bơta kòp bơtờp.

Bơyai lơh bơto bơsram mờ bơsram wơl nàng rơcăng ai dơ̆ pơrlòng jơh bơsram kấp pe in gơwèt mờ kơnòm bơsram ơdŭ 12 geh cồng nha, sền gàr ală bơta pal geh ờdo ờdă nàng lam lơh dơ̆ pơrlòng jăt jơnau sồr, bơta bơto pơlam bơh Bộ Giáo dục mờ Đào tạo dê. Ủy ban Nhân dân ală kơnhoàl, ƀòn dờng sơlơ tơnguh tai broă lơh ătbồ kràñ kơnòm bơsram, cau bơsram dờng ală kấp tàm tiah he dê, sền gàr ală bơta pal geh ờdo ờdă nàng lam lơh jăt dơ̆ pơrlòng jơh bơsram kấp pe nam 2021 jăt bơta bơto pơlam; lam lơh jăt kràñ cê jơh nùs ală broă lơh rơcăng sơndră kòp Covid-19 jăt jơnau sồr mờ bơta bơto pơlam bal.

Cau mblàng Lơ Mu K’Yến