VOV4.K’ho- Tơnơ̆ mờ 15 ngai tus bal sơn đờm nam bơsram pa geh pờ tàm anih sơnđio rùp mờ bơsram sră geh pờ tàm internet tàm hìu nàng rơcang sơndră mờ kòp Covid-19, drim òr (20/09), rơlao 164 rơbô nă kơnòm bơsram ală cấp bơsram tàm càr Kon Tum neh lòt bơsram, sơn đờm dơ̆ bơsram sră tơrgùm bal sơnrờp ngan bơh nam bơsram pa 2021-2022 dê.

Was bơta duh să jan kơnòm bơsram ngai sơnrờp lòt bơsram tàm hìu bơsram cấp 3 Lê Lợi, ƀòn dờng Kon Tum

Dơ̆ bơsram sơnrờp ngan bơh kơnòm bơsram ơdŭ 1, hìu bơsram cấp 1 Thực Hành Sư phạm Ngụy Như ƀòn dờng Kon Tum

Broă bơyai lơh ai kơnòm bơsram lòt bơsram tơrgùm bal geh càr Kon Tum sền gròi nền nòn ngan mờ bơta ờ do ờ dă uă ngan ai kơnòm bơsram bal mờ cau pơgru in. Tus tŭ do, bŭ lah kung neh geh 27 nă cau geh gŏ mờ virus Sars CoV-2, mơya càr Kon Tum là dùl càr tàm Tây Nguyên ờ hềt geh dờp cau lơi gơtờp kòp tàm mpồl bơtiàn. Tàm ƀùi drim sơnrờp ngan kơnòm bơsram geh lòt bơsram tơrgùm bal tàm hìu bơsram, Mpồl kuang atbồ hìu bơsram bơh 373 hìu bơsram tàm càr Kon Tum neh lơh jăt nền nòn broă rơcang sơndră mờ kòp Covid-19 gơtờp. Jơh ală kơnòm bơsram kung bè cau pơgru ndrờm geh gròi sền bơta duh să jan mờ pơn chèo sùm tàm tơngai bơto, bơsram tàm hìu bơsram.

Cau mblàng Ndong Brawl