VOV4.K’ho- Tàm càr Kon Tum, gah lơh sơnơm càr do gam tàm ntoăt pơrlòng mờ tŭ tơngai nàng tus jơh nhai 11 nam 2021 do lơh geh jơnau kờñ cĭt tơl vaccine kòp Covid-19 ai cau rlau 18 sơnam in. Ia Chim là xã rềp kềng bơh ƀòn dờng Kon Tum dê. Jơh gùt xã do geh rlau 7 rbô nă cau bơh 18 sơnam rlau hơđang bal mờ mìng là làng bol jơi bơtiàn kòn cau dùl êt nă cau là cau Jrai mờ cau Bahnar.

Hìu sơnơm xã Ia Chim pà gĭt, nàng lơh geh jơnau kờñ tus jơh nhai 11 sền bal lơh sir broă cĭt tơl ding vaccine kòp Covid-19 ai mpồl cau bơh 18 sơnam rlau hơđang in, bal mờ ai tơl bè phan bơna ai broă lơh cĭt vaccine in, hìu sơnơm xã gam pơgồp bal niam mờ gơnoar ătbồ xã lơh jăt niam broă mblàng yal, hòi jà nàng làng bol lòt cĭt vaccine. Nàng lơh mhar broă cĭt vaccine kòp Covid-19, gah lơh sơnơm càr Kon Tum ai lài ai cau lơh broă jơh gùt tŭ tơngai tàm 111 anih cĭt vaccine tàm ù tiah càr dê. Bal mờ hơ̆, ngui niam gơnoar broă bơh rlau 2 rbô 800 mpồl lơh broă mpồl bơtiàn dê tàm broă lơh mblàng yal, bơto pơlam làng bol lòt cĭt vaccine rơcăng sơndră kòp.

Cau mblàng Lơ Mu K’Yến