VOV4.K’ho - Nhai 4 pa do, Ủy ban Mặt trận Dà lơgar Việt Nam càr Kon Tum neh lam lơh dơ̆ lam sồr nàng lơh tam gơl nùs nhơm kơlôi sơnơng, broă lơh bơh làng bol kòn cau, lơh làng bol kòn cau gĭt brồ guh klàs mờ rơƀah kơl jăp. Tus bal dơ̆ lam lơh geh kuang bàng đơng lam càr; ala măt ală sở, gah lơh broă bal mờ 10 kơnhoàl, ƀòn dờng tàm càr Kon Tum bal mờ rơlao 100 nă cau geh pơnrơ jăk là cau kòn cau tus bal.

Càr Kon Tum geh rơlao 53% khà kờp làng bol là kòn cau rài kis gam uă kal ke. Geh bơta do geh sền là tài bơta ngăc ngar tàm broă bơsram sră gam ờ uă; gam geh nùs nhơm kơ̆p gơn tàm broă dong kờl bơh Dà lơgar; ờ hềt gĭt tàm broă ngui khoa học kỹ thuật tàm broă lơh sa... Tŭ do, gùt càr gam rơlao 13 rơbô 600 hìu là kòn cau geh mờr 94% khà hìu rơƀah mờ rơlao 7 rơbô 500 hìu ndrờm mờ rơƀah geh rơlao 90% pơn drờm mờ kờp jơh khà hìu ndrờm mờ rơƀah tàm gùt càr.

Broă lam lơh tam phan lơh sơnơm tàm tiah mƀur chi brê tiah làng bol kòn cau kơnhoàl Kon Plông dong kờl làng bol tơnguh priă lơh geh tàm rài kis

Kờñ lơh tam gơl nùs nhơm kơlôi, broă lơh làng bol kòn cau, lơh làng bol kòn cau in gĭt tàm broă brồ guh klàs mờ rơƀah kơl jăp, Ủy ban Mặt trận Dà lơgar Việt Nam càr Kon Tum neh ai 5 kơnòl tờm, hơ̆ là: Lam sồr, yal ală gùng dà broă lơh, tàm hơ̆ uă ngan là gah ù tiah, tơmù rơƀah kơl jăp, bơ̆t bơtàu ƀòn lơgar pa tus mờ làng bol kòn cau; Yal ală broă lơh niam, broă lơh geh cồng nha; Bơto sồr làng bol kòn cau rơƀah mờ ndrờm mờ rơƀah in ngui geh cồng nha bơta pràn tàm hìu nhă, priă càn nàng tơnguh bơtàu broă lơh sa; Bơto sồr làng bol tam gơl ală bơta phan tam, phan ròng; Lam sồr làng bol kòn cau tus bal mờ ală mpồl lơh broă bal, hợp tác xã tam phan lơh sơnơm, tơnguh bơtàu broă lơh sa suơn sre kloh niam, ngui công nghệ cao, tus bal tàm broă tam brê, sền gàr mờ atbồ brê.

Đơs tàm dơ̆ pơrjum lam lơh, ồng Nguyễn Văn Hoà, Phó Bí thư Tỉnh ủy, Chủ tịch HĐND càr Kon Tum sồr: Ală cấp, ală gah lơh broă, Mặt trận Dà lơgar Việt Nam ală cấp tàm càr pal geh uă broă lơh mờ broă lơh mùl màl nàng drơng gàr rài kis phan bơna mờ nùs nhơm ai làng bol in; tam pà bal, dong kờl làng bol gơtìp kal ke tàm rài kis, tàm hơ̆ uă ngan là làng bol kòn cau, tiah ngài... Lơh niam broă lam sồr, tơnguh mờ pờ ơnàng mpồl tam klăc gùt jơi bơtiàn kòn cau. Lam sồr làng bol ală kòn cau rơhời tam gơl nùs nhơm kơlôi sơnơng, broă lơh, sơbì rơhời ală bơhiàn ờ niam, gĭt tàm broă lơh sa, lơh ală hìu làng bol kòn cau rơƀah mờ ndrờm mờ rơƀah brồ guh klàs mờ rơƀah kơl jăp.

Kĭ hơ bal pơrlòng dơ̆ lam sồr "Lơh tam gơl nùs nhơm kơlôi sơnơng, broă lơh bơh làng bol kòn cau, lơh làng bol kòn cau in gĭt klàs mờ rơƀah kơl jăp

Ồng Nguyễn Văn Hoà đơs là, do là dơ̆ lam sồr dờng ngan càr dê, nàng geh cồng nha mùl màl pal tơnguh geh nùs nhơm lam lài bơh ală kuang bàng, cau geh đảng mờ ai geh tơngu me bơh tơl bơnah broă lơh mùl màl: “Tŭ he ai broă lơh tam gơl nùs nhơm kơlôi sơnơng mờ broă lơh bơh làng bol kòn cau den bơh sơnrờp ngan bơh ală cau geh bơngă pin dờn tàm làng bol he dê. Hơ̆ sồng ală kuang bàng cau geh đảng là cau kòn cau pal lam lài, pal lơh lài. Jơh ală mpồl lơh broă chính trị he tus bal nàng gĭt loh ală nùs nhơm kơlôi sơnơng, broă lơh mờ làng bol kòn cau pal tam gơl ha là bơsram bal nàng brồ guh klàs mờ rơƀah kơl jăp, lơh pas di pal bơh să tờm, hìu nhă mờ mpồl bơtiàn in”.

Dơ̆ lam sồr geh ai tơngu me tusnam 2025 geh bơh 70% rơlao hờ đang hìu làng bol kòn cau rơƀah, ndrờm mờ rơƀah geh tam gơl nùs nuơm kơlôi sơnơng, sơbì rơhời ală bơhiàn ờ niam, ờ kơ̆p gơn tàm broă dong kờl bơh Dà lơgar, lơh is, brồ guh is nàng klàs mờ rơƀah kơl jăp; Geh bơh 40% khà hìu gĭt ngui khoa học kỹ thuật tàm broă lơh sa; Rơlao 25% khà hìu geh rài kis phan bơna, nùs nhơm geh gơguh; Khà hìu rơƀah, ndrờm mờ rơƀah là cau kòn cau gơmù bơh 3 tus 4% pah nam.

Lam lơh tàm pơrjum, Chủ tịch Ủy ban Mặt trận Dà lơgar Việt Nam càr Kon Tum đơs loh: Mờ jơnau kơ̆p kờñ dong kờl làng bol kòn cau kis tàm càr geh rài kis nùs nhơm, phan bơna ngai sơlơ geh mờ gơguh uă, pơgồp bal tàm broă lơh geh cồng nha Nghị quyết pơrjum dờng Đảng bộ càr dơ̆ 16, tơngai lơh broă bơh nam 2020 tus 2025 neh geh ai, Ban Thường vụ Tỉnh ủy neh geh jơnau đơs pơn dŭt sồ 08 bè gùng dà broă lơh jăt dơ̆ lam sồr “Lơh tam gơl nùs nhơm kơlôi sơnơng, broă lơh bơh làng bol kòn cau, lơh nàng làng bol kòn cau brồ guh klàs mờ rơƀah kơl jăp” tàm càr. Mờ bơta kuơ màng do, Ủy ban Mặt trận dà lơgar Việt Nam càr lam lơh dơ̆ lam sồr mờ hòi jà ală cấp, ală gah lơh broă, ală mpồl lơh broă chính trị mpồl bơtiàn, làng bol ală kòn cau, ală gah jăt yàng tàm càr tam klăc bal, pơgồp bal mờ Mặt trận Dà lơgar Việt Nam lam sồr; lơh geh bơta pràn bơh dơlam is, rơcang bơceh lơh, hòi jà ală bơta geh, bơta kuơ tàm tơl ƀòn tàm broă tus bal lơh jăt dơ̆ lam sồr.

Tàm dơ̆ lam lơh dơ̆ lam sồr “Lơh tam gơl nùs nhơm kơlôi sơnơng, broă lơh bơh làng bol kòn cau, lơh nàng làng bol kòn cau brồ guh klàs mờ rơƀah kơl jăp”, Ủy ban Mặt trận dà lơgar Việt Nam càr Kon Tum neh bơyai kĭ hơ bal broă pơgồp bal lơh jăt dơ̆ lam sồr, tơngai bơh nam 2021 tus 2025 mờ UBND càr mờ kĭ hơ bal pơrlòng lơh jăt dơ̆ lam sồr bơh Ủy ban Mặt trận Dà lơgar Việt Nam 10 kơnhoàl, ƀòn dờng.

Cau mblàng Ndong Brawl