VOV4.K’ho- Sơlơ tơnguh broă rcang sơndră kòp Covid-19, mờ kung tơrgùm bơtàu tơnguh lơh sa, mpồl bơtiàn, lơh ngan lơh jat geh cồng nha “jơnau kờñ dơ̆ lĕ bal” là kơnòl broă tờm geh ồng Lê Ngọc Tuấn Phó Bí thư Tỉnh ủy, Chủ tịch UBND càr dê ngan ngồn đơs sùm tàm pơrjum ờs mờng nhai 5 bơh UBND càr Kon Tum dê.

Tàm 5 nhai bồ nam, bơta lơh sa- mpồl bơtiàn bơh càr dê kơ̆ kơljap, bơtàu tơnguh mờ lơh geh uă cồng nha niam ngan tàm jơh ală gah. Bè lơh sa suơn sre, kờp tus ngai 15/5, ală tiah sền bal tơnhào jơh phan tam kàl mrềt -prang; broă lơh atbồ, sền gàr brê geh lơh jat geh cồng nha. Broă lơh bơt bơtàu ƀòn lơgar pa geh ală gah, sơnah lơh broă, ală tiah lơh ngan lam lơh jat mờ 28 xã neh dờp là xã ƀòn lơgar pa. Tàm 5 nhai bồ nam, priă lơh geh bơh tăc phan mờ lơgar ndai pơn jat tai tàm khà gơguh mờ kờp jơh priă lơh geh bơh tăc phan mờ lơgar ndai là 92 tơlak 500 rơbô dolar Mỹ.

Kuang đơng lam bồ càr Kon Tum sồr ală gah sơnah lơh broă, ală tiah pơn jat tai lơh kràn cê, dơ̆ lĕ bal, geh cồng nha ală kơnòl broă, broă lơh bơtàu tơnguh lơh sa- mpồl bơtiàn mờ nùs nhơm rcang sơndră kòp Covid-19 geh cồng nha, mờ tơrgùm bơtàu tơnguh lơh sa, lơh ngan lơh sir “jơnau kờñ dơ̆ lĕ bal”.

Cau mblàng K’Hạnh