VOV4.K’ho- Tàm càr Kon Tum tài gơrềng bơh tơnơ̆ mìu càl rbŭt dờng sồ 6 tàm ngai 24/9, tàm ù tiah càr dê geh mìu di mơ, mìu dờng tus mìu dờng ngan lơh uă tiah gơtìp ngơr bam dà, tơrlah ù.

Tiah tơrlah ù lơh gơkòl gùng lòt tàm gùng dờng 40B gơl lòt gan kơnhoàl Tu Mơ Rông

Dà tih tàm dà dờng Đăk Bla gơl lòt gan ƀòn dờng Kon Tum gơguh tih ngan

Tàm ală kơnhoàl tiah kơh bơnơm bơh càr Kon Tum dê, tàm hơ̆ geh: Kon Plông, Tu Mơ Rông, Đăk Glei mìu dờng dà kŏ dà cò neh lơh gĭt nđờ jơ̆t tiah tơrlah ù tàm ală gơl gùng càr dê bal mờ bàr pe gùng lòt tàm ală xã. Bơta gơ kòl gùng lòt kung neh gơlik geh tàm gùng dờng 40B tàm kơi sồ 161+400 gơwèt ù tiah kơnhoàl Tu Mơ Rông. Ai tàm bàr pe tiah thòng lơyah tàm ală kơnhoàl, bè: Sa Thầy, Đăk Tô, Đăk Hà, ƀòn dờng Kon Tum mìu dờng neh lơh gơbàn ngơr bam lìu dà tàm rbàng dà lìu lơh gùng lòt mut tàm dơlam ală tiah do dê gơtìp tam cah is.

Cih dờp bơh sơnrờp pà gŏ tàm kơnhoàl Tu Mơ Rông, Sa Thầy mìu dờng neh lơh ngơr bam dà gĭt nđờ jơ̆t lồ kòi, phan tam lơyah ngai mờ lơh bàr pe nơm phan poan jơng, iar ơda gơtìp chơ̆t. Tềng đap bơta mìu dờng dà kŏ dà cò gam pơn jat tai mờ digơlan jŏ jòng tàm mang do, gơnoar atbồ ală kơnhoàl, ƀòn dờng càr Kon Tum dê lơh lài broă gàr niam bơta ờdo ờdă  màng kis mờ phan bơna bơh làng bol dê.

Cau mblàng K’Hạnh