VOV4.K’ho- Càr Kon Tum geh 6 xã kal ke uă, tàm hơ̆ geh 3 xã tiah nhàr lơgar mờ 6 Pôs đồng ling sền gàr tiah nhàr lơgar tàm gơl gùng tiah nhàr lơgar rềp nhàr bal mờ lơgar Lào tàm 2 kơnhoàl Đăk Glei mờ Ngọc Hồi, Mpồl duh broă tĕ khà dà lơgar ai gơnoar bơyai lơh tĕ khà gờñ lài dùl ngai, hơ̆ là ngai do 22/5.

Tiah đùh sră sồ 2 thôn Đăk Nớ, xã Đăk Nhoong, kơnhoàl Đăk Glei lài mờ ngai tĕ khà gờñ

Rcang kƀàng yal bơto pơlam cau tĕ khà rcang sơndră kòp Covid-19

Tàm ngai tĕ khà gờñ 22/5, 6 xã kal ke uă geh 36 tiah đùh sră mờ kờp jơh geh rlau 10 rơbô nă cau. Tàm ală tiah đùh sră gờñ tàm càr Kon Tum, bal mờ broă gàr niam phan bơna ai broă tĕ khà in, gơnoar atbồ mờ gah lơh broă geh gơnoar tàm tiah do dê kung lơh jat niam broă lơh rcang sơndră kòp Covid-19.

Lài mờ ngai tĕ khà, Kuang bàng, cau lơh sơnơm neh ƀồm sơnơm lơh kloh khuẩn, rơndap tiah was să jan, kơƀàng ơn dà rào tê lơh kloh khuẩn, chèu glòm muh mat sơnơm mờ ai ơm yah ngài tŭ sền gŏ ală cau tĕ khà kòp duh să, bơsiă, kal ke tă nhơm tàm tŭ tus bal  tĕ khà.

Cau mblàng K’Hạnh