VOV4.K’ho- Sở Giáo dục mờ Đào tạo càr Kon Tum neh ai tơngai sơn đờm mŭt bơsram nam bơsram pa 2021-2022 gơwèt mờ kơnòm bơsram ală cấp tàm ngai 05 nhai 09 mờ ngai tơnơ̆ ngai 06 nhai 09 sơn đờm ngai bơsram sơnrờp ngan.

Cau pơgru hìu bơsram cấp 2 Văn Lem, xã Văn Lem, kơnhoàl Đăk Tô tam chi hờ bơdìh mpồng hìu bơsram

Nàng gàr niam ờ do ờ dă tàm bơta kòp Covid-19 gơtìp kal ke mờ ală kơnòm bơsram tàm tiah ngài, tiah làng bol kòn cau geh tơl phan ngui bơsram ai nam bơsram pa in, Mpồl kuang atbồ hìu bơsram ală hìu bơsram tàm càr Kon Tum gam lơh ngan lơh gơs broă rơcang. Tus tŭ do jơh ală hìu bơsram tàm ală kơnhoàl tiah ngài, tiah làng bol kòn cau bè Đăk Glei, Tu Mơ Rông, Kon Plông…càr Kon Tum dê neh lơh gơs broă pơs wàs kloh niam ơdŭ, hìu bơsram. Kuang atbồ hìu bơsram Cấp 1 Nguyễn Văn Cừ, tàm xã kal ke Đăk Pxi, kơnhoàl Đăk Hà pà gĭt, nam bơsram pa do hìu bơsram geh 278 nă kơnòm bơsram mờ 90% là oh kòn, kòn cau Sơdàng. Tus tŭ do, broă rơcang ai ngai sơn đờm mờ nam bơsram pa tàm hìu bơsram neh lơh gơs.

Cau mblàng Ndong Brawl