VOV4.K’ho- Tàm càr Kon Tum tàm 24 jiơ do geh mìu dờng tus dờng ngan, dà mìu geh bơh 80 tus 240 milimét mờ gơnoar ătbồ tiah do neh gŏ bàr pe bơta hoàc hươr.

Jrong rbàng yồng tàm dà dờng Pô Kô tàm thị trấn Đăk Glei, kơnhoàl Đăk Glei gơtìp tơrlah

Drim ngai 17/10, Ủy ƀan Nhân dân càr Kon Tum geh sră sơrbac mhar pơyua ală sở, ƀan, ngành, anih lơh broă mờ ală tiah tàm càr mờ Ủy ƀan Nhân dân 10 kơnhoàl mờ ƀòn dờng rơcăng lài sơndră wơl mờ mìu dà tih, ngơr bam jrô dà, dà cò, tơrlah ù. Hoàc hươr bơh sơnrờp tài bơh mìu dà tih lơh aniai geh gŏ gơwèt mờ ală gùng lòt. Tài mìu dờng, dà tàm ală dà dờng dà croh gơguh tih jơnhoa ngan, tàm kơnhoàl Đăk Glei, dùl nơm rbàng yồng ƀă gan dà dờng Pô Kô tàm tơrbŏ bal thị trấn Đăk Glei mờ 2 thôn: Đông Sông mờ Đông Thượng neh gơtìp dà cò pơrdô tĕ jrong rbàng.

Anih ngơr bam rbàng dà lìu tàm gùng lòt mŭt tàm xã Đăk Psi, kơnhoàl Đăk Hà

Gơnoar ătbồ tiah do ai tồt kƀàng cih yal tơngkah lài, mờ ai cau tus drơng sùm bơto pơlam làng bol lòt pơdar wơl rbàng ndai. Bơta mìu dà tih lơh tơrlah ta luy gơlam tus gơkòl gùng lòt tŭ do kung gơlik geh tàm bàr pe gơl gùng tàm kơnhoàl Kon Plông mờ Tu Mơ Rông.

Cau mblàng Lơ Mu K’Yến