VOV4.K’ho- Tàm 9 nhai pa do, Kon Tum là càr geh cồng nha gơ hòi gơ jà bơcri priă rơndap broă lơh bơdìh mờ kes priă ờ pràn ngan rlau jơh pơndrờm mờ ală càr tàm tiah Tây Nguyên. Tềng đap bơta geh ngan do, tàm Pơrjum dơ̆ 5 Ban chấp hành Đảng bộ càr khoá 16 pờ ơnàng pa geh bơyai lơh tàm poh do, Tỉnh ủy Kon Tum neh lời ai tŭ tơngai tơrgùm cribơyai nàng sền gĭt bơta gơkòl, jòi broă lơh nàng gơ hòi gơ jà bơcri priă.  

Tàm 9 nhai pa do, càr Kon Tum gơ hòi gơ jà geh 28 rơndap broă lơh mờ kờp jơh priă dan bơcri rlau 8 rơbô tơmàn đong mơya jơh ală bơta kung gam tàm bơta bơcri priă tàm sră pơ àr lơm. Ngan là, tŭ do mìng pa geh 2 rơndap broă lơh neh lơh sir mờ mut lơh  sa kă bro mờ kờp jơh priă bơcri rlau 100 tơmàn đong, 5 rơndap broă lơh gam lam lơh bơcri priă mờ kờp jơh khà priă 24 tơmàn đong mờ khà uă 21 rơndap broă lơh gam wơl kung gam tàm tơngai lơh sir sră nggal. Jat ồng Ngô Việt Thành, Kuang atbồ Sở Kế hoạch mờ Đầu tư càr Kon Tum đơs, dùl bơta gơ kòl kuơ màng ngan tàm broă gơ hòi gơ hà bơcri priă bơh càr dê là broă geh gơrềng tus ù tiah.

Mờr 90% rơndap broă lơh geh gơrềng tus ù tiah den ndrờm geh bơta tìs mờ krơi is đah rơndap ù tiah 3 bơta brê mờ bơta geh ngan ù tiah tŭ do dê den là tàm rơndap rơndồl ngan tàm broă lơh jat gùng dà broă lơh bơcri priă. Bơdìh hơ̆, uă rơndap broă lơh dan broă rơndap ù tiah bơtàu tơnguh lơh sa- mpồl bơtiàn halà rơndap ù tiah ờ di pal mờ jơnau dan bơh cau bơcri priă dê. Den bàr pe UBND kơnhoàl, ƀòn dờng tŭ yal tơngĭt kes priă ù tiah kung ờ hềt kờp sền nền nòn tus di tŭ cau bơcri priă lơh sră  nggal den gơtìp uă bơta kòl yan, tàm rơndap rơndồl mờ ală rơndap broă lơh neh geh gùng dà broă mờ tàm rơndap rơndồl mờ ală rơndap broă lơh neh ai gơnoar mut lơh halà ờ di pal mờ rơndap ù tiah bal dê.

Dà croh duh Đăk Tô uă nam gơtìp lời gời kơ̆p gơn cau bơcri priă

Bal mờ jơnau tờm geh đơs hơđang, ală bơta gơkòl tai tàm broă gơ hòi gơ jà bơcri priă tàm càr Kon Tum dê kung geh sơñio hơ̆ là ờ pràn tàm broă atbồ bơh Sở, gah lơh broă geh gơnoar dê. Bè là ờ ring bal tàm broă ai jơnau đơs sền sơwì lơh gơrềng tus bơta niam, tŭ tơngai bơh ală rơndap broă lơh bơcri priă dê; Ală tiah ờ hềt lơh jat niam gơnoar broă jat sền, sền sơwì bơcri priă nàng di tŭ gĭt loh, tă bơsong bơta kal ke kòl yan ai cau bơcri priă in; ờ tơl kràñ tàm broă jat sền tŭ tơngai bơcri priă bơh ală rơndap broă lơh dê. Đơs tus bơta ờ pràn bơh càr dê tàm gah gơ hòi gơ jà bơcri priă, Ủy viên Đảng Dà lơgarr, Bí thư Tỉnh ủy, Chủ tịch HĐND càr Kon Tum ồng Dương Văn Trang ngan ngồn tơngkah tus gơnoar mờ kơnòl broă bơh cau đơng lam bồ dê gơwèt mờ jơnau sồr pal tam gơl tơn.

Bol he đơs bal tàm hơ̆ geh dùl, bàr pe nă kuang bàng là kơnòl broă lơh ờ hềt jơh nùs mờ ờ ngăc ngar tài bơta lơh bal bơh càr dê, tài bơh bơta lơh bal bơh làng bol dê. Tàm broă jàu mờ đơs bè khà sồ bơta pràn tàm pơrlòng geh dùl broă jàu hơ̆ là ngac ngar bơh kuang đơng lam bồ dê. Den càr kung là kuang đơng lam bồ mờ Sở kung là kuang đơng lam bồ sơl, kuang đơng lam bồ bơh Sở dê. Ai he den tŭ khi tus den he tìp mat, tŭ ờ gŏ lòt tus den he kung ờ gŏ tìp mat sơl, ờ duh kờñ pal geh. Mpồl lơh sa kă bro khi đơs là ờ duh kờñ den kung ờ geh bơta lơi sơl, den rƀah sùm lơh sa- mpồl bơtiàn ờ bơtàu tơnguh ờ.

Tam mờ lơh gơlik phan lơh sơnơm tàm dùl gah broă tàm càr Kon Tum dê gơ hòi gơ jà bơcri priă

Bal mờ sền gĭt bơta gơ kòl, lơh ngan jơh nùs bơt bơtàu tiah bơcri priă song dơ pă, ƀuơn ngan mờ ngăc ngar nàng gơ hòi gơ jà bơcri priă, dùl broă lơh tai kung gam geh càr Kon Tum kràñ cê lơh ngan lơh jat, hơ̆ là kờp sền wơl, lơh ngan jơh nùs lời tĕ ală cau bơcri priă ờ tơl bơta pràn, bơcri priă jat broă lơh mìng kờñ geh rơndap broă lơh lơm, ai tơnơ̆ hơ̆ den lời wơl rơndap broă lơh ai cau ndai in nàng jòi priă cồng.

Cau cih Khoa Điềm- Cau mblàng K’Hạnh