VOV4.K’ho- Tơngai do, tài bơh mìu dờng jŏ jòng lơh uă anih gam lơh gơwèt Rơndăp broă lơh niam wơl ală gơl gùng kuơmàng tàm gùng rơndeh dờng 24 gơl lòt gan kơnhoàl Kon Plông, càr Kon Tum gơtìp tơrlah ù uă ngan. Tềng đăp bơta do, Mpồl ătbồ rơndăp broă lơh mờ ală mpồl lơh gùng gam mhar lam lơh niam wơl nàng gàr niam ờdo ờdă gùng lòt mơkung lơh mhar tŭ tơngai bơsir wơl bơnah broă gơtìp lơyài tài bơh gơrềng bơh mìu dà tih dê.

Lòt sền dùl anih tơrlah tàm gùng rơndeh 24

Tơrgùm kờp bơh Mpồl ătbồ rơndăp broă lơh lơh gùng lòt càr Kon Tum dê tàm gùng rơndeh 24 pà gŏ, tàm bơnah broă sồ 4 mờ sồ 5 jòng rlau 24 kơi sồ lòt gan ù tiah kơnhoàl Kon Plông geh 6 anih tơrlah ù bal mờ kờp jơh priă hoàc hươr là 10 tơmàn đong. Sở Giao thông Vận tải càr Kon Tum pà gĭt, bal mờ jơnau sồr ală mpồl lơh gùng lam khòm tơrgùm wàs jơh ù lŭ nàng gàr niam gùng lòt tàm gơl gùng 24, mpồl lơh gùng kung neh gĭt nền loh làng bè priă jền lơh niam wơl, mơkung geh dan mờ Ƀộ Giao thông Vận tải ai tam gơl gùng dà rơndăp lơh kềng gùng đah thòng jrô tàm bàr pe anih nàng gơl gùng kơ̆ kơl jăp rlau.

 Cau mblàng Lơ Mu K’Yến