VOV4.K’ho- Tềng đăp jơnau yal ƀòn dờng Hồ Chí Minh ờ tơl ngan biăp sa tàm ală ngai ơm yah ngài mpồl bơtìan nàng tam dră mờ kòp Covid-19, uă Câu lạc bộ, Mpồl dờng, Mpồl dềt lơh broă dong kờl is tài bơh mpồl bơtiàn bal mờ gĭt nđờ rhiang nă cau tàm mpồl tàm càr Kon Tum dê neh bơyai lơh lòt tơrgùm biăp sa nàng pơndiang lòt dong kờl làng bol ƀòn dờng Hồ Chí Minh.

Bơh àng drim gờñ tơn, bi Nguyễn Thị Thảo Nguyên- Cau ătbồ Câu lạc bộ mhàm duh tiah Kon Tum mờ Tây Nguyên neh geh măt tàm dùl sươn tam biăp tàm sơnah ƀòn Nguyễn Trãi, ƀòn dờng Kon Tum dê. Bi Nguyên pà gĭt, bơh mạng internet mpồl bơtiàn, bi gĭt geh broă lơh geh kuơ ngan bơh Câu lạc bộ dê, là cau tờm sươn biăp dê jòi gùng dong kờl Câu lạc bộ 2 rbòng biăp sơvê sàng goh. Broă gam wơl bơh ală cau tàm Câu lạc bộ dê là pin mờ jun rê tus anih ơn tơrgùm bal mờ prăp gàr nàng biăp ir tơlir niam sùm. Bi Nguyễn Thị Thảo Nguyên, đơs: Biăp tam di tàm ngai pik sa tơn, lơh bè lơi nàng biăp par tơlir, pal sàng goh ngan. Jun tus tàm hơ̆ mờ ồm là jơh tơl nă cau kung ờ gơtùi ngui sa sơl den là pơlai gời. Bol oh kung lùp sơl mờ ală câu lạc bộ tàm ală kơnhoàl nàng lơh anih dờp phan dong kờl bơh jơh tơl nă cau dê. Tơnơ̆ hơ̆, bol oh geh ơn tơrgùm tus dùl anih tàm ƀòn dờng Kon Tum mờ tơnơ̆ hơ̆ jun tàm rơndeh mờ pơndiang lòt jun.

Ală cau tàm Câu lạc bộ

Pơgồp bal lơh jăt broă lơh dong kờl biăp sa dong làng bol ƀòn dờng Hồ Chí Minh, ală câu lạc bộ, ală mpồl dờng, mpồl dềt lơh broă dong kờl is tài mpồl bơtiàn tàm càr Kon Tum neh tă pơgồp geh pơgăp 10 tấn biăp sa nàng pơyua tus làng bol ƀòn dờng Hồ Chí Minh in. Bal mờ ală bơta biăp sa tơn, bè biăp sơvê, biăp mùng tơi, biăp mpiă...den gam geh sơl rơpual, plai nhồng, khuah rbài ală bơta gơtùi lời jŏ ngai. Bơta dờng màng ngan, geh kuơ ngan là uă làng bol tàm càr Kon Tum lơh jăt dùl nùs bal. Bi Bùi Thị Tuyết Yên ơm tàm mpồl 2, sơnah ƀòn Nguyễn Trãi, ƀòn dờng Kon Tum geh sươn biăp mpiă tăc pah ngai neh lơh nền dong kờl jơh sươn biăp hìu bơnhă dê, pà gĭt bè do: Hìu bơnhă sùm tam biăp mpiă, dilah pik geh kàr lơi den pik jơh mờ tơnơ̆ hơ̆ den dong kờl ai ală cau tàm tiah hơ̆ in. Neh geh lài rơndeh bè hơ̆ den ală oh lòt den añ dong kờl ai ală làng bol tàm tiah hơ̆ in. Dùl pèt tŭ jơgloh dờng màng rlau mờ dùl kơnâm tŭ hờm den tài, mò pàng he đơs bè hơ̆.

Bal mờ broă lam lòt tơrgùm biăp sa bơh uă anih tàm ƀòn dờng Kon Tum mờ ală kơnhoàl, bè: Đăk Hà, Đăk Tô, Kon Plông...ală cau tàm Câu lạc bộ mhàm duh tiah Kon Tum mờ Tây Nguyên, Añ gơboh Kon Tum, Team Kon Tum...geh bơyai lơh sac rwah, prăp gàr nàng jun biăp sa tàm ƀòn dờng Hồ Chí Minh. Bi Trần Văn Cao Sang là cau ătbồ Câu lạc bộ Añ gơboh Kon Tum pà gĭt: gùng dà jun pơndiang mờ tam pà biăp sa tàm tơngai kòp bơtờp Covid-19 kung neh kờp dŭ lơh bè lơi nàng prăp gàr biăp sa tus tơn tàm tê làng bol ƀòn dờng Hồ Chí Minh dùl bă sơrbac mhar ngan rlau jơh mờ niam ngan rlau jơh. Bi Trần Văn Cao Sang, đơs: Bơh sơnrờp là rơcăng apah rơndeh pơndiang phan nàng lòt. Apah rơndeh den pal lơh xét nghiệm kòp Covid-19. Añ lùp geh mờ câu lạc bộ, mpồl dờng, mpồl dềt tàm Gia Lai den khi geh ală rơndeh lòt jun phan ờ sa priă. Añ lòt jun tus tềng hơ̆ bal mờ khi. Ai tiah tờm den añ geh lùp sơl mờ Thành đoàn Hồ Chí Minh mờ ală câu lạc bộ, mpồl dờng, mpồl dềt tàm hơ̆. Khi rơcăng dờp phan bơh añ dê nàng khi jun tus tiah ơm yah ngài mờ ală tiah gam wàng se kơryan kòp.

            Cau cih Khoa Điềm- Cau mblàng Lơ Mu K’Yến