VOV4.K’ho - Tềng đăp mờ jơnau tơngĭt bơh broă geh uă làng bol kis tàm ƀòn dờng Hồ Chí Minh ờ tơl biăp sa tàm ală ngai tam cah ngài nàng rơcang sơndră mờ kòp Covid-19, bơh àng drim ngai òr (12/07), uă mpồl cau lơh broă nùs nhơm dong kờl tài mpồl bơtiàn mờ gĭt nđờ rơhiang nă cau tàm càr Kon Tum neh bơyai lơh tơrgùm biăp tơlir mờ tơngu me geh ai là tus mho do (13/07) geh pơn diang di pơgăp 10 tấn biăp dong kờl làng bol ƀòn dờng Hồ Chí Minh.

                                                      Pơn diang biăp tus tàm anih tơrgùm bal

Pơgồp bal lơh jăt broă dong kờl biăp tơlir dong kờl làng bol ƀòn dờng Hồ Chí Minh, ală mpồl cau lơh broă nùs nhơm dong kờl tàm càr Kon Tum neh ai khà tơrgùm geh di pơgăp 10 tấn biăp tơlir pơyoa pà làng bol kis tàm ƀòn dờng do in. Bơdìh mờ ală bơta biăp geh ngui mơ, bè sơbê, mùng tơi, biăp ngŏt... gam geh rơpoal, nhồng, khoah di gơlan geh ngui jŏ ngai. Kuang lam bồ mpồl añ gơgoh Kon Tum pà gĭt, gùng dà broă pơn diang mờ tam pà biăp tơlir tàm bơta kòp Covid-19 kung neh geh kơlôi sơnơng nền nòn nàng biăp tơlir tus mờ làng bol ƀòn dờng mhar ngan mờ ờ do ờ dă ngan.

Cau mblàng Ndong Brawl