VOV4.K’ho- Bơh ală bơnah priă dong kờl hìu r[ah bơtàu tơnguh lơh sa, uă hìu làng bol kòn cau Sơdàng tàm kơnhoàl Kon Plông, càr Kon Tum neh tam geh kơnuh sơnơm jrang (đẳng sâm) mờ tu\ do làng bol gam lơh geh priă jền uă bơh broă tam tờm chi tam do.

Cồng nha lơh geh kàl tơnhàu bơh sơnrờp tàm bă ù rlau 18 lồ pà go\, kơnuh sơnơm jrang geh cau Sơdàng tam tàm ù mìr tàm ală xã: Măng Bút, Măng Cành, Đăk Tăng mờ xã Hiếu ( kơnhoàl Kon Plông) geh tơnhàu geh bơh 1 tấn nggùl tus 2 tấn tàm dùl lồ. Mờ priă tăc geh bơh 120 rbô đong tus 150 rbô đong dùl ki\ kơnuh ris, tơl lồ làng bol lơh geh priă jền bơh 200 tơlak tus 300 tơlak priă.

Jat Phòng Nông nghiệp mờ Phát triển Nông thôn kơnhoàl Kon Plông yal, gơnoar atbồ kơnhoàl gam tơrgùm ală priă jền pơgăp 3 tơmàn 800 tơlak dong làng bol bơcri rề ơnàng bă ù tam tờm đẳng sâm, đương quy, sa nhân. Mìng is tàm nam 2018 do pơn jat tai tam rlau 100 lồ tờm chi lơh sơnơm.

 Cau mblàng Lơ Mu K’Yến