VOV4.K’ho- Mho ngai 12/11, tàm ƀòn dờng Kon Tum, càr Kon Tum, Sở Y tế càr Kon Tum neh bơyai lơh dơ̆ tìp măt mờ jờng rơ, jàu sră jờng rơ bơh Chủ tịch Ủy ban Nhân dân càr Kon Tum dê ai 30 nă cau lơh sơnơm bơh càr dê in lơh gơs kơnòl broă dong kờl càr Bình Dương rơcăng sơndră mờ kòp Covid-19.

Jàu sră jờng rơ bơh Chủ tịch Ủy ban Nhân dân càr Kon Tum dê ai ală cau lơh sơnơm tus bal tam dră mờ kòp Covid-19 tàm càr Bình Dương in

Đơs tàm dơ̆ tìp măt, ƀác sĩ Chuyên khoa II, ồng Võ Văn Thanh- Kuang ătbồ Sở Y tế càr Kon Tum jờng rơ nùs nhơm dong kờl is, ờ ngòt bòl glar kal ke, sơbơng roh bơh 30 nă cau lơh sơnơm dê mŭt tàm tiah bơtờp uă kòp càr Bình Dương nàng dong kờl, tàm sơm băt tê bal bal mờ cau lơh broă bal rơcăng sơndră kòp Covid-19. Kuang ătbồ Sở Y tế càr Kon Tum tơlik nùs nhơm kơ̆p kờñ, là tàm tơngai kòp Covid-19 tàm ù tiah càr Kon Tum gam gơbàn kal ke ngan, ală cau lơh sơnơm lơh jăt niam ală bơta mờng chài kuơ ngan bơh dơ̆ tus bal rơcăng sơndră mờ kòp tàm càr Bình Dương, pơgồp bơnah bal mờ gah lơh sơnơm bơh càr dê kơryan geh cồng nha kòp bơtờp, sền gàr mờ drơng sền pràn kơldang să jan làng bol in.

 Cau mblàng Lơ Mu K’Yến