VOV4.K’ho- Sở Nông nghiệp mờ Phát triển Nông thôn càr Kon Tum bơyai lơh tơn jơh lơh jăt Rơndăp broă lơh tam gơl lơh broă sa suơn sre kơ\ kơl jăp (Rơndăp broă lơh VnSAT) nam 2019 tàm kơnhoàl Đăk Hà.

Rơndăp broă lơh “Tam gơl lơh broă sa suơn sre kơ\ kơl jăp tàm Việt Nam” geh lơh bơh nam 2015- 2020 tàm 13 càr, tàm hơ\ kơnhoàl Đăk Hà là kơnhoàl bơh càr Kon Tum dê geh rwah lơh lài lam lơh jăt. Rơndăp broă lơh geh lơh tàm 2 hợp tác xã, 11 mpồl lơh broă bal lơh sa suơn sre mờ mờr 2 rbô 800 hìu bơnhă cau lơh broă sa tus bal mờ kờp jơh bă ù là rlau 2 rbô lồ kơphê. Ală broă lơh do neh lơh gơlik bơta tam gơl uă ngan tàm kơlôi sơnơng lơh sa bơh cau lơh kơphê dê pơndrờm mờ broă tam phan ờs mờng bơh lài.

Tơngai tus, Mpồl ătbồ rơndăp broă lơh do pơn jăt tai dong kờl cau lơh broă sa tă bơsong kal ke bè priă bơcri; bơyai lơh pờ ală ơdu\ bơto pơlam, cribơyai mờng chài ngan ngồn tàm ală bă ù neh lam lơh jăt nàng làng bol in lòt còp, lùp bơsram. Mơkung hòi jà ală mpồl lơh sa kă bro, cau bơcri priă sơlơ lơh bal, gàr niam drà blơi phan nàng tơnguh uă ală anih lơh gơlik phan ai cau tam kơphê in.

Cau mblàng Lơ Mu K’Yến