VOV4.K’ho- Bulah là càr ờ hềt geh cau kòp, mơya tềng dap bơta gơlik geh kal ke bơh kòp Covid-19 dê, ngai 17/5, Chủ tịch UBND càr Kon Tum neh geh kơrnoat tơnguh jơnau yal tơngkah t lài rcang sơndră kòp Covid-19 gơguh tus khà uă ngan rlau jơh. Jat hơ̆, UBND càr Kon Tum geh kơrnoat tơnguh jơnau yal tơngkah lài rcang sơndră kòp Covid-19 tàm ù tiah càr dê gơguh tus khà uă ngan rlau jơh bơh 12 jiơ mang do ngai 18/5.

Cau tĕ khà xã Đăk Dục, kơnhoàl Ngọc Hồi, càr Kon Tum, lơh jat niam broă pơn chèu glòm muh mat tŭ tus sền jơnau yal tàm anih rcang tĕ khà

Bal mờ jơnau sồr ală gah sơnah lơh broă geh gơnoar mhar bơyai lam lơh jat niam ală broă lơh rcang sơndră kòp. UBND càr Kon Tum sồr làng bol pal pơn chèu glòm muh mat tŭ lik bơh tàm hìu kung bè tàm tiah mpồl bơtiàn mờ lơh jat niam jơnau sồr 5 K rcang sơndră kòp bơh Bộ Y tế dê. UBND càr Kon Tum kung sồr UBND 10 kơnhoàl, ƀòn dờng bơh càr dê hòi jà jơh bal ală anih lơh broă chính trị, ală mpồl lơh broă sền gròi niam tàm ù tiah he dê, hìu bơnhă, làng bol, nàng sền gŏ tơn ală cau geh bơta pơhìn bơtờp kòp nàng lam lơh ală broă lơh rcang sơndră kòp di tŭ.

Cau mblàng K’Hạnh