VOV4.K’ho- Kơnờm lơh niam broă lơh rơcang sơndră kòp Covid-19, Kong ti TNHH Kơphe 15 gơ wèt Quân khu 5, Bộ Quốc phòng geh anih lơh broă tàm xã Cư Dliê Mnông, kơnhoàl Cư M’gar, càr Dăk Lăk neh gàr sùm broă lơh sa, kă bro geh cồng nha, gàr priă lơh geh, gàr niam rài kis ai công nhân, cau lơh broă in.

Kong ti kơphe 15 là mpồl lơh broă ling klàng geh kơnòl bơtàu tơnguh lơh sa mờ sền gàr lơngap lơngai, sền gàr dà lơgar. Tŭ do, kong ti tam rlau 800 lồ kơphe, 300 lồ kau su, ai geh broă lơh rlau 1 rbô 200 nă công nhân, cau lơh broă in, tàm hơ̆ geh rlau 170 nă công nhân jơi bơtiàn kòn cau dùl êt nă cau.

Mpồl lơh sơnơm ling klàng gròi sền pràn kơldăng să jan mờ yal bè tiah lòt rê lài mờ tŭ mut tàm kong ti

Mờ jơnau đơs “Lơh sa, bơtàu tơnguh mờ ờdo ờdă” tàm broă lam lơh jơnau kờñ dơ̆ lĕ bal, tơngai lài, Kong ti kơphe 15 neh sơlơ tơnguh mờ lam lơh nền nòn ală broă lơh rơcang sơndră kòp Covid-19, mờ kung gàr sùm broă lơh sa ờdo ờdă. Kong ti sền dờng màng tus ală bơnah broă gròi sền jơnau pơhìn bơtờp kòp bơh sơn rờp. Kuang bàng, cau ling, công nhân, cau lơh broă ndrờm pal lơh jat nền nòn jơnau sồr bè rơcang sơndră kòp bơ tờp; geh lơh xét nghiệm kòp Covid-19 mờ broă lơh xét nghiệm kháng nguyên halà mờ RT-PCR jat tơngai pơrgon. Jơh ală rơndeh rơndồ, phan bơna mut tàm kong ti, hìu măi ndrờm geh ƀồm sơnơm lơh kloh khuẩn ờdo ờdă... Kơnờm bè hơ̆, ală hìu măi, xí nghiệp, ală mpồl sơngka sền gàr kơpphe kung gam gàr sùm broă lơh sa.

Bi H’Duân Niê, công nhân tàm Kong ti kơphe 15 yal, tài gơ rềng bơh kòp Covid-19 lơh hìu bơnhă bi gơtìp uă ngan kal ke, mơya kong ti neh di tŭ pơn jờng, dong kờl  gàr niam rài kis mờ pơlam lơh jat rơcang sơndră kòp den tàng tơl nă cau ing nùs ngan lơh gơs ală khà, ală broă geh jàu: “Bè broă rơcang sơndră kòp den añ kung lơh jat jơnau sồr 5K. Đah kong ti dong kờl wil tơl, ală tŭ kal ke den dong kờl phe, dà màn, boh, ƀòk ngòk nàng sàu sa mờ dong kờl priă nhai nàng geh priă drơng tàm rài kis pah ngai”.

Bi Ma Văn Tân, cau lơh broă dờp ơpah lơh kơphe tàm Kong ti kơphe 15 den đơs: “Kơnờm đah kong ti gròi sền tus cau lơh broă, tàm tơngai kòp bơtờp bè do kung geh cit sơnơm vaccine rơcang sơndră kòp nàng cau lơh broă in iang nùs lơh broă tàm kong ti mờ đềt mềr mờ kong ti jŏ jòng”.

Kong ti Kơphe 15 cit sơnơm vaccine rơcang sơndră kòp Covid-19

Đại úy, ling mờng chài Nguyễn Thị Thu Ngân, atbồ mpồl 3 pà git, tus tŭ do, 100% công nhân bơh mpồl dê ndrờm neh geh cit sơnơm vaccine rơcang sơndră kòp Covid-19. Kơnờm lam lơh niam broă mblàng yal, kuang bàng, công nhân, cau lơh broă neh tơnguh jơnau git wă rơcang sơndră kòp, lơh ngan ờ lời kòp bơtờp uă lơh gơ rềng tus broă lơh sa, kă bro bơh Kong ti dê mờ broă lơh bơh cau lơh broă dê: “Gơwèt mờ mpồl lơh broă bol hi, bơh tŭ kòp gơlik geh den 100% cau lơh broă, cau ling tàm mpồl ling ndrờm gàr ờdo ờdă. Mờ cồng nha tàm broă rơcang sơndră kòp geh anih lơh broă đơs là lơh jat niam, ờ lời gơlik geh bơta ờ niam, kờp bal tàm mpồl ling mờ công nhân kung bè tàm ù tiah ƀòn lơgar. Bơta krơi is bơh mpồl dê là sơngka sền gàr kơphe mờ tàm bă ù tam kơphe den kung pal lơh jat jơnau sồr ơm yah ngài mờ bơdìh, bañ tơrgùm gal cau den tàng kơnòl broă sơngka sền gàr kung gam geh lơh bè ờs”.

Jat Đại tá Phạm Xuân Thành, Kuang atbồ Kong ti TNHH kơphe 15 pà git, kơnờm lam lơh ring bal ală broă lơh rơcang sơndră kòp, ngan là lơh jat nền nòn jơnau sồr 5K bơh Bộ Y tế dê, tus tŭ do, kong ti kung gam gàr ờdo ờdă rơcang sơndră kòp, gàr kơ̆ kơljap broă lơh sa, kă bro geh priă cồng: “Ală mpồl lơh broă gơ wèt Đoàn lơh sa Quốc phòng,a lă mpồl lơh sa ndrờm geh mpồl rơcang sơndră kòp Covid-19 sùm pah ngai lòt sền, gròi sền tàm ù tiah lơh broă nàng yal bè broă rơcang sơndră kòp mờ broă gơlik geh bơh kòp bơtờp dê. Bè đah mpồl lơh sa kă bro, ờ kơp gơn tàm bơta dong kờl bơh kấp hơđang dê. Gơ wèt mờ mpồl lơh sa kă bro kung gam gàr sùm lơh sa, kă bro dùl bă bè ờs. Mìng is 9 nhai bồ nam, bol hi neh geh priă cồng rlau 3 tơmàn đông, sơrlèt rlau 1 dơ̆ mờ nggùl pơndrờm mờ broă rơndap lơh nam 2021 dê. Tàm bơta kal ke bè do, mơya Đảng ủy, Mpồl kuang atbồ, mpồl cau lơh broă lơh ngan nàng gàr sùm broă lơh sa”.

Kong ti Kơphe 15, Quân khu 5 là krơh niam tàm broă lam lơh geh cồng nha jơnau kờñ dơ̆ lĕ bal, ờ mìng rơcang sơndră kòp ờdo ờdă mờ gam lơh geh cồng nha tàm broă lơh sa kă bro, ai geh broă lơh mờ gàr kơ̆ kơljap rài kis ai cau lơh broă in.

Cau mblàng K’Duẩn