VOV4.K’ho- Kong ti ồs đèng Dăk Lăk pa lam lơh jàu pà 4 nơm hìu nùs nhơm ai ală hìu bơnhă kal ke tàm xã Ea Ktur, kơnhoàl Cư Kuiñ mờ xã Cư Kpô, kơnhoàl Krông Buk mờ xã Ea Bông, kơnhoàl Krông Ana in. Tơl nơm hìu geh kong ti dong kờl 60 tơlak đông, hìu bơnhă mờ ală mpồl, gah broă lơh tàm ƀòn lơgar tă pơgồp tai ngai lơh hìu, priă jền nàng lơh hìu dờng rlau jat jơnau kờñ ngui hìu.

Kong ti ồs đèng Dăk Lăk jàu hìu nùs nhơm ai hìu bơnhă kal ke in

Mut ơm tàm hìu pa, bi H’Nuyn Êban, ơm tàm ƀòn Jung A, xã Ea Ktur, kơnhoàl Cư Kuiñ ngoh rơngac đơs: “Añ chờ hờp ngan tài bơh tŭ do neh geh hìu pa nàng ơm. Lài do hìu bơnhă añ ơm kis ing tàmhìu sèt, tŭ do añ ờ gam kơlôi rơcang tai pah tŭ trồ mìu halà trồ tơngai. Añ ưn ngài ngan ală kấp neh dong lơh hìu ơm hìu bơnhă añ in”.

Kong ti ồs đèng Dăk Lăk pà hìu nùs nhơm ai bi H'Nuyn Êban in

Ồng Trần Văn Thuận, Kuang atbồ Kong ti ồs đèng Dăk Lăk pà git, tơnguh broă lơh gàr ờdo ờdă rài kis mpồl bơtiàn di tơngkah 45 nam ngai crơng gơs kong ti, tàm nam do, bal mờ ală broă lơh jàu pà phan ai ală mpồl lam lài sơndră kòp, tă pơgồp tàm kes priă rơcang sơndră kòp Covid-19... kong ti gam dong kờl rlau 400 tơlak đông nàng lơh 6 nơm hìu nùs nhơm dong ală hìu bơnhă kal ke.

Cau mblàng K’Duẩn