VOV4.K’ho- Ngai rlô tus do, 23/5, cau tĕ khà bơh càr Dak Nông dê geh lơh jat gơnoar tĕ khà tàm 680 anih đùh sră. Drơng broă lơh kuơmàng do in, Kong ti ồs đèng Dak Nông neh lam lơh dùl ròt uă rơndap broă nàng gàr broă pờ tơlik ồs đèng kơ̆ kơljap, pờ tơlik sùm, ờdo ờdă lài, tàm mờ tơnơ̆ ngai tĕ khà.

                             Măi pờ tơlik đèng rơcang lài bơh Kong ti ồs đèng Dak Nông dê

Là càr tiah nhàr dà lơgar geh ù tiah dờng ơnàng, gùng che đèng jơh ală ơm tàm tiah kơh bơnơm kal ke, bulah bè hơ̆, ală mpồl ồs đèng tàm Dak Nông neh bơyai lam lơh lòt sền jat tơngai pơrgon ngai, mang, kuơmàng là tàm ală gơl gùng che đèng kuơmàng. Bal mờ hơ̆, ală mpồl neh rơcang lài tơl phan bơna rơcang gàr lài mờ ală phan bơna ờdo ờdă, rơcang lơh niam mhar tŭ gơlik geh broă ờ niam bè ồs đèng.

Lòt sền măi pờ tơlik đèng ai tiah tĕ khà tàm xã nhàr lơgar Quảng Trực, kơnhoàl Tuy Đức in

Ală mpồl kung rơndap cau lơh broă ơm sền gròi sùm, măi pờ tơlik đèng rơcang lài tàm ală anih đùh sră. Mờ bơta rơcang lài wil tơl, kong ti ồs đèng Dak nông pin dờn geh gàr broă pờ tơlik đèng ờdo ờdă, pơgồp bơnah tàm cồng nha bơh ngai tĕ khà dà lơgar dê.

Cau mblàng K’Duẩn