VOV4.K’ho- Mho ngai 28/12, tàm ƀòn dờng Buôn Ma Thuột, Kông ty ồs đèng Dăk Lăk neh bơyai lơh tơngkah kir sơnrai 45 nam ngai crơng gơs (28/12/1976- 28/12/2021) mờ dờp Bằng khen bơh Thủ tướng Cíñ phủ dê. Lòt gan 45 nam bơt bơtàu mờ bơtàu tơnguh, tus tŭ do, Kông ty ồs đèng Dăk Lăk gam atbồ, ai ngui rlau 450 kơi sồ gùng che đèng 110kV; rlau 4 rbô kơi sồ gùng che đèng trung áp; 6 rbô 200 trạm ƀiến áp; pờ tơlik ồs đèng ai rlau 574 rbô nă cau ngui đèng tàm Dăk Lăk in, geh mờr 100% khà kờp làng bol geh ồs đèng ngui.

Nam do, bulah kòp Kovid-19 gơlik geh kal ke, Kông ty kung gam lơh geh priă jền 3 rbô 260 tơmàn đong, tơmut tàm kes priă dà lơgar 50 tơmàn đong. Bơdìh mờ broă lơh sa kă bro, Kông ty ồs đèng Dăk Lăk neh geh uă broă lơh sền gàr rài kis mpồl bơtiàn, wèt tus ƀòn lơgar. Mìng tàm 5 nam rềp ndo, Kông ty neh tă rlau 3 tơmàn 600 tơlak đong ai broă lơh mpồl bơtiàn- lơh broă niam dong kờl cau tàm càr in. Mìng is tàm nam 2021, kờp jơh khà priă lam lơh broă do geh rlau 880 tơlak đong. Di tŭ tơngkah kir sơnrai 45 nam ngai crơng gơs, Kông ty ồs đèng Dăk Lăk neh pơn iờ să ngan geh Thủ tướng Cíñ phủ pà Bằng khen.

Cau mblàng K’Duẩn