VOV4.K’ho - Chủ tịch UBND càr, Kuang atbồ Mpồl đơng lam rơcang sơndră mờ kòp gơtờp tàm kòn bơnus càr Dăk Nông neh kĭ kơrnoăt tam cah ngài jơh gùt kơnhoàl Dăk Mil, ngui nền nòn ală broă lơh jăt Chỉ thị sồ 16 tơnơ̆ mờ tŭ gŏ cau gơtờp mờ kòp Covid-19 tàm mpồl bơtiàn.

Kơnhoàl Dăk Mil lơh jăt broă tam cah ngài mpồl bơtiàn jăt Chỉ thị sồ 16 nàng rơcang sơndră mờ kòp Covid-19

Tơngai lơh jăt broă tam cah ngài bơh 10 jơ mang ngai 14 nhai 9 tus tàm tŭ geh jơnau yal pa nàng rơcang sơndră mờ kòp gơtờp. Jăt jơnau yal bơh Mpồl đơng lam kơnhoàl Dăk Mil yal, ngai 13 nhai 9, hìu sơnơm kơnhoàl do dờp jơnau yal geh dùl hìu kis tàm mpồl ƀòn 2, thị trấn Dăk Mil gơtìp duh să, glar tàm să. Ai mẫu xét nghiệm RT-PCR, 4 nă cau tàm hìu ndrờm geh gŏ mờ virus Sars CoV-2. Jăt broă lùp sền kòp, hìu nhă do kă bro plai chi, tàm pơgăp 10 ngai lài, geh tìp mờ cau măi rơndeh pơn diang plai chi rê bơh ƀòn dờng Hồ Chí Minh. Tơnơ̆ mờ tŭ geh gŏ cau gơtờp mờ kòp tàm mpồl bơtiàn, kơnhoàl Dăk Mil neh tơlik kơrnoăt wàng se, kơrian 4 tiah geh cau gơtờp kòp, mờ ai ală cau gơtìp kòp Covid-19 mŭt tàm tiah sơm kòp bơh hìu sơnơm kơnhoàl dê mờ ai 164 nă cau F1 lòt tam cah is tơrgùm bal.

Cau mblàng Ndong Brawl