VOV4.K’ho- Kờp bơh 12 jơ klo ngai, ngai 22/9, kơnhoàl Dăk R’lấp, càr Dăk Nông tơn jơh broă ơm yah ngài mpồl bơtiàn jat Jơnau sồr sồ 16. Jơh gùt kơnhoàl geh tam gơl lơh jat jơnau sồr sồ 15. Bulah bè hơ̆, tềng đap broă gơlik geh bơh kòp bơtờp dê gam kal ke, Ủy ban Nhân dân càr Dăk Nông sồr Ủy ban Nhân dân kơnhoàl Dăk R’lấp ngui 2, 3 broă lơh rơcang sơndră kòp Covid-19 jat jơnau sồr sồ 15+ gơ wèt tus mờ xã Dăk Ru mờ xã Quảng Tín, là 2 xã geh ală mpồl cau bơtờp kòp tàm mpồl bơtiàn uă. Mờ ală anih tac phan ñô sa kềng gah gùng dờng, mìng tac cèng rê. Tàm ală anih tam cah is tơrgùm bal, ală cau F1 pơn jat tai tơn jŏ broă tam cah is 7 ngai tai. Kơnhoàl pơn jat tai sồr làng bol ờ huan lik bơdìh, lơh jat ală broă lơh rơcang sơndră kòp Covid-19, lơh ngan ờ lời kòp bơtờp wơl.

Kờp tus ngai 22/9, càr Dăk Nông geh 664 nă cau bơtờp mờ virus Sars CoV-2. Tàm hơ̆, kơnhoàl Dăk R’lấp geh 314 nă. Jơh gùt càr tŭ do geh 242 nă cau kòp neh geh rê bơh hìu sơnơm, 1 nă cau chơt.

Cau mblàng K’Duẩn