VOV4.K’ho-  Nàng kờñ dong kờl di tŭ ai làng bol tàm tiah ai ơm yah ngài, ngan là ală hìu bơnhă rƀah, hìu bơnhă làng bol jơi bơtiàn kòn cau, hìu bơnhă geh rài kis kal ke kơnhoàl Dăk R’lấp, càr Dăk Nông neh hòi jà làng bol tă pơgồp bal geh rlau 100 tấn phan ngui, phan sa mờ biăp, bùm plai đo. Jat hơ̆, bơh ngai 07/9 tus tŭ do, kơnhoàl Dăk R’lấp neh hòi jà tă pơgồp bal rlau 55 tấn phe, 66 tấn biăp, bùm, plai đo, mờr 1 rơbô 300 bơnah phan pà mờ rlau 300 tơlak đong priă mat dong kờl làng bol rcang sơndră kòp Covid-19. Bơdìh mờ broă dong kờl ai làng bol tiah ai ơm yah ngài, tiah wàng se in, kơnhoàl neh tam pà phe, biăp, bùm, plai đo tus ală tiah ai ơm yah ngài tơrgùm bal tàm ù tiah do dê.

Là tiah lài ngan tàm Dăk Nông lơh jat broă ai ơm yah ngài, tiah wàng se nàng kơryan kòp Covid-19, ồng Phạm Văn Hải, atbồ ing gơnoar Chủ tịch UBND xã Quảng Tín, kơnhoàl Dăk R’lấp pà gĭt, mờ bơta dong kờl, sơm bat tê bal bơh ală anih lơh broă, mpồl lơh broă mờ làng bol, ală hìu bơnhă mờ cau dùl nă să is tàm tiah ai ơm yah ngài, tiah wàng se, neh geh tơl phan ngui, phan sa. 2 tiah kal ke ngan rlau jơh bè kòp Covid-19 là ƀòn Bu Bir mờ Bu Dzách, tus tŭ do kòp neh geh gròi sền mờ rài kis làng bol dê neh rê wơl bè ờs.

Cau mblàng K’Hạnh