VOV4.K’ho- Tơnơ̆ tŭ kơnhoàl Dăk R’lấp, càr Dăk Nông lơh jat broă ơm yah ngài mpồl bơtiàn jat Jơnau sồr sồ 16 tàm ngai 07/9 mờ jơnau đơs “cau lơi ơm tềng lơi den ơm mŏ tềng hơ̆” nàng rơcang sơndră kòp bơtờp, mpồl tam klac cau ùr kơnhoàl neh lam lơh broă lơh “shippe 0 đông” lòt drà dong làng bol.

Lòt drà ala dong làng bol

Jat hơ̆, tàm 11 xã, thị trấn, Mpồl tam klac cau ùr kơnhoàl neh crơng gơs 110 mpồl lòt drà 0 đông mờ bơta tus bal bơh mờr 700 nă cau tàm mpồl tàm ală thôn, ƀòn, tổ dân phố.Pah ngai, ală mpồl “shippe 0 đông” geh dờp sră cih mat phan lòt drà dong ală hìu bơnhă làng bol. Tŭ jàu phan, ală cau tàm mpồl ờ gŏ di ơm rềp tơn, mờ lời wơl phan tềng mpồng hìu làng bol in kờñ gàr jat jơnau sồr rơcang sơndră kòp. Broă lơh do geh Mpồl tam klac cau ùr kơnhoàl Dăk R’lấp gàr sùm tàm tơngai ơm yah ngài mpồl bơtiàn jat Jơnau sồr sồ 16.

Cau mblàng K’Duẩn