VOV4.K’ho - Tềng đăp mờ bơta kal ke broă lơh sa ai git nđờ rơbô nă làng bol rê bơh ală càr hờ đah jum tơnơ̆ mờ kòp Covid-19, kơnhoàl Krông Buk, càr Dăk Lăk gam bơ̆t bơtàu gùng dà broă lơh di pal nàng bơsong broă lơh bal mờ rài kis tềng đăp măt kung bè ală broă lơh geh nùs nhơm jŏ jòng nàng dong kờl ai broă lơh làng bol rê hờ ƀòn lơgar in.

Jơh tơngai tam cah is tơnơ̆ mờ tŭ rê hờ ƀòn lơgar tờm mờ rơndeh Honda, bi Y Ngọc Niê, kis tàm ƀòn Ktơng Drun, xã Cư̆ Né, kơnhoàl Krông Buk gam jòi broă lơh di pal tàm ƀòn lơgar. Bi Y Ngọc Niê pà git, lài do bi lơh công nhân tàm công ty tàm thị xã Bến Cát, càr Bình Dương.

Kờp bơh nhai 5 tus tŭ do, kơnhoàl Krông Buk neh geh di pơgăp 6 rơbô nă làng bol rê bơh ală càr hờ đah jum dà lơgar

Tài kòp Covid-19 gơtìp kal ke, tơnơ̆ mờ uă nhai “gơtìp kòl” tàm càr Bình Dương tŭ càr do lơh jăt nền nòn ală broă rơcang sơndră mờ kòp gơtờp, bŭ lah neh geh cit tơl 2 ding sơnơm vaccine rơcang sơndră mờ kòp, mơya tài broă lơh ờ geh, mờ nùs nhơm ngòt gơtờp kòp sùm geh pah ngai, khà priă prăp kung neh jơh, bi Y Ngọc Niê lơh ngan rê hờ ƀòn lơgar tờm nàng pleh mờ kòp bal mờ jòi geh broă lơh rềp mờ hìu. “Añ gam rơcang tŭ broă lơh geh niam rơlao den geh jòi dùl broă lơh di pal mờ să jan. Tài añ gơboh mờ broă măi rơndeh mờ kung neh geh ƀàng măi rơndeh, den tàng tŭ kòp neh ờ hoan geh tai den geh jòi broă lơh tàm dùl công ty ha là mpồl lơh sa kă bro lơi nàng măi rơndeh. Gam tềng đăp măt den añ ơm tàm hìu dong kờl lơh broă mìr sre, kung rơcang tàm kàl tơnhào kơphe, den tàng añ geh lòt pic plai kơphe ơpah nàng geh tai priă”.

Tài rài kis hìu nhă kal ke, ờ tơl ù lơh sa, den tàng pơgăp mờ do 2 nam, bi Lương Văn Hữu, kis tàm ƀòn Cư̆ Mtâo, xã Ea Sin, kơnhoàl Krông Buk lòt tus càr Bình Dương nàng lơh công nhân. Bơh lồi nhai 5 lài do, kòp Covid-19 gơtìp kal ke tàm ală càr hờ đah jum dà lơgar, công ty koh tơmù cau lơh broă, bi pal rê hờ ƀòn lơgar tờm nàng pleh mờ kòp gơtờp. Tàm tơngai kơ̆p jòi geh broă lơh, bi Hữu neh dan tus bal mờ broă lơh nùs nhơm dong kờl bal mờ đoàn ơruh pơnu dong kờl broă rơcang sơndră mờ kòp gơtờp tàm ƀòn lơgar. “Añ rê añ gŏ ală cau lòt lơh broă dong kờl glar ir, să tờm añ ơm tàm hìu mờ trồ mìu bè do kung ờ geh broă lơh sơl den tàng añ tus bal, dong kờl geh broă lơh lơi den dong kờl. Añ kơ̆p kờñ kòp gơtờp mhar jơh nàng rài kis rê wơl bè ờs”.

 Kờp dŭ tàm kàl pĭc plai kơphe nam do, kơnhoàl Krông Buk kờñ geh di pơgăp 27 rơbô nă cau pĭc tàm 30 ngai

Jăt ồng Hoàng Kiên Cường, Chủ tịch UBND kơnhoàl Krông Buk, càr Dăk Lăk yal, bơh nhai 5 tus tŭ do, kơnhoàl neh dờp di poơgăp 6 rơbô nă làng bol rê bơh ală càr Bình Dương, Đồng Nai mờ ƀòn dờng Hồ Chí Minh, jơh ală làng bol ndrờm tàm sơnam lơh broă, lòt lơh broă ngài, nàng geh priă ngui tàm rài kis. Tơnơ̆ mờ tŭ geh dờp làng bol rê, kơnhoàl neh lơh jăt ală broă gròi sền broă lơh sơnơm, tam cah broă tam cah is di jăt mờ kơrnoăt geh ai nàng gàr niam ờ do ờ dă tàm broă rơcang sơndră mờ kòp.

Tŭ do, gùt kơnhoàl geh mờr 19 rơbô 800 lồ kơphe mờr mŭt tàm kàl tơnhào, mờ khà geh kờp dŭ là di pơgăp 44 rơbô 200 tấn gar. Jăt mờ hơ̆, geh di pơgăp mờr 800 rơbô nă cau pic, ndrờm mờ mờr 27 rơbô nă cau lơh broă pic tàm tơngai 30 ngai. Ală nam lài, pah nam kơnhoàl pal hòi jà rơlao 6 rơbô 600 nă cau bơh ală càr ndai nàng tus pic plai kơphe. Nam do, tài kòp gơtờp gơtìp kal ke den tàng khà cau lơh broă do gơlơh bè ờ gơtùi geh hòi jà, ala mờ hơ̆, kơnhoàl geh ngui cau lơh broă rê bơh ală càr nàng tơl niam broă pic plai kơphe di kàl, mờ geh ai broă lơh mờ geh priă tềng đăp măt ai làng bol in. Ồng Hoàng Kiên Cường đơs: “Tềng đăp măt gơwèt mờ kàl tơnhào kơphe tus do den di gơlan khà cau lơh broă gơtìp ờ tơl uă mờ kung neh geh bơtơl mpồl cau lơh broă tàm ală càr hờ đah jum rê, den do kung là bơta nàng bơsong broă lơh tềng đăp măt. Gam bè jŏ jòng den tơnơ̆ mờ tŭ neh ring niam bơta kòp mờ gròi sền niam geh kòp gơtờp, den kung pơn jăt tai chồl pràn broă bơto broă lơh nàng ai broă lơh ală mpồl cau lơh broă in; hòi jà ală mpồl lơh sa kă bro bơcri priă nàng lơh bè lơi ală mpồl lơh sa kă bro tus den hơ̆ sồng geh pơgồp bal tàm broă ai broă lơh ală làng bol tàm kơnhoàl in, tàm hơ̆ uă ngan là ală làng bol rê bơh ală càr hờ đah jum in”.

Jăt jơnau kờp bơh Sở Lao động-Thương binh mờ Xã hội càr Dăk Lăk yal, bơh nhai 07 nam 2021 tus tŭ do, gùt càr geh rơlao 75 rơbô nă làng bol bơh ală càr rê. Mìng is bơh bồ nhai 10 tus tŭ do, geh mờr 26 rơbô nă cau. Tàm hơ̆ geh uă ngan là công nhân gam lơh broă tàm ală tiah lơh sa mờ măi mŏk càr Bình Dương, Đồng Nai, ƀòn dờng Hồ Chí Minh. Nàng dong kờl mpồl cau do, Sở neh lơh broă mờ ală càr, ƀòn dờng kờñ rơwah cau lơh broă nàng pơgồp bal mờ broă lam sồr tŭ ală hìu măi lơh broă bè ờs wơl tơnơ̆ mờ kòp gơtờp. Mìng is gơwèt mờ ală cau lơh broă kờ` lơh broă rềp tàm ƀòn lơgar, Sở kung sồr mờ phòng Lao động tàm ală kơnhoàl, thị xã, ƀòn dờng tơrgùm khà măt nàng bơ̆t bơtàu gùng dà broă lơh dong kờl di pal.

Cau cih H’ Xíu- Cau mblàng Ndong Brawl