VOV4.K’ho-Bơh ală broă lơh tơrgùm wơl sră neh ngui, ròng sur ù, blơi lịch sa tềp nàng lơh kes priă ai srơh Broă rơndap lơh dềt, uă kơnòm bơsram geh rài kis kal ke tàm Dak Lak neh geh tai bơta gơn kơnờm nàng lòt bơsram. Kes priă bơh srơh neh geh ală hìu bơsram ngui nàng jàu priă bơsram, dong kờl phan ngui bơsram, ào mpha ram ai kơnòm bơsram rƀah in.

Tơnơ̆ tŭ geh ùr pơgru Tổng phụ trách đội lam lơh tàm dơ̆ gờm chờ bùng bi bồ poh mờ ùr pơgru atbồ ơdŭ bal mờ kơnòm bơsram drơng broă tàm ơdŭ yal tàm ơdŭ, oh Nguyễn Quỳnh Nhi, ơdŭ 7A2, Hìu bơsram kấp bàr Ngô Quyền, thị trấn Ea Drăng, kơnhoàl Ea H’leo, càr Dak Lak neh lơh ngan ơrgùm prap lời ală sră nàng cèng dờp cau pơgru in. Oh Nguyễn Quỳnh Nhi yal, oh mờ ală gơ̆p bơyô ndrờm lơh ngan tus bal srơh Broă rơndap lơh dềt tài bơh hìu bơsram lam lơh. Ờ geh ală bơnah priă uă nàng tă pơgồp bal den oh sùm prap tơl sră băo yau, thùng carton ờ gam ngui tai tàm hìu bơnhă halà lòt dờñ; khòm ală sră neh ngui gam gơ rung tàm ƀlàng hìu bơsram halà tàm ơdŭ bơsram cèng rê tàm hìu prap lời mờ dờp tàm broă rơndap lơh dềt in.

Pah ngai geh sră lơi ờ gam ngui tai den oh ơn tàm thùng rềp tàm tiah sền sră bơh oh dê nàng tus ngai dờp sră ờ gam ngui tai den oh gơtùi cèng ală sră do ơn tàm kơldung nilông mờ dờp ai hìu bơsram in. Oh gơlơh chờ hờp ngan tài bơh gơtùi dong ală gơ̆p bơyô rƀah tàm hìu bơsram, tă pơgồp priă jền dong kờl ală gơ̆p bơyô. Bơdìh hơ̆, Hìu bơsram gam ngui khà priă do nàng lơh ƀlàng nhơl.

Kơnòm bơsram kấp bàr Ngô Quyền, Ea Drăng lơh jat broă rơndap lơh dềt

Mờ broă lam lơh ƀuơn, tàm dơ̆ lam lơh bơh sơn rờp bơh nam bơsram 2020-2021, Hìu bơsram kấp bàr Ngô Quyền neh tơrgùm wơl geh pơgap 2 tấn sră ờ gam ngui tai, kờp priă mờr 3 tơlak 500 rơbô đong. Bal mờ hơ̆, tàm hìu bơsram gam lam lơh ală broă lơh bè: hòi jà tă pơgồp ào mpha, sră măy, phan ngui bơsram gam gơtùi ngui nàng pà ai kơnòm bơsram tàm tiah kal ke in. Tàm 5 nam do, hìu bơsram neh tă pơgồp geh 1 rơbô 500 blah ào mpha; 800 pang sră măy; rlau 200 nơm sơgơn ndau, kong tàp, phan ngui bơsram, drờm mờ rlau 1 tấn 2 tạ phan lời pà kơnòm pa tàu mờ kơnòm dềt geh rài kis kal ke tàm ală xã tiah sar lơgar ngài tàm ù tiah kơnhoàl dê in. Oh Phan Trường Nhất, Liên đội phó Hìu bơsram kấp bàr Ngô Quyền, thị trấn Ea Drăng, kơnhoàl Ea H’leo, càr Dak Lak đơs.

 Oh sền gŏ ală gơ̆p bơyô tus bal jơh nùs ngan, ală sră ờ gam ngui tai gơrung tàm ù, ală pang sră cih neh jơh ngui den gơtùi tơrgùm wơl, dờñ khòm wơl nàng dong kờl ală gơ̆p bơyô rƀah geh rài kis kal ke, ală gơ̆p bơyô bơsram jak ngan sơrlèt gan bơta kal ke.

Bơh kes priă srơh Broă rơndap lơh dềt neh dong uă đội viên, kơnòm bơsram geh dờp bơta dong kờl

Ờ mìng is tàm hìu bơsram kấp bàr Ngô Quyền lơm, bơh uă nam do, srơh Broă rơndap lơh dềt neh geh uă hìu bơsram kấp dùl mờ hìu bơsram kấp bàr tàm Dak Lak lam lơh mờ lơh gơ rề. Mờ uă ngan broă lơh krơi is, bè: Bơyô dong bơyô; Bàr nă he bơtàu tơnguh bal; Yang phe nùs nhơm; mpồl iar khăn quàng đỏ; Kes priă tài gơ̆p bơyô rƀah; Ròng sur ù... srơh neh geh lơh gơ rề nàng kờñ tă pơgồp kes priă dong kờl ai ală kơnòm bơsram geh rài kis kal ke in, sơr lèt gan bơta kal ke mờ bơsram jak. Oh Nguyễn Thái Thùy Linh, kơnòm bơsram hìu bơsram kấp bàr Tân Lợi, ƀòn dờng  Buôn Ma Thuột, càr Dak Lak yal:

Tàm hìu bơsram Tân Lợi bơh oh dê kung geh uă ngan srơh dong kờl gơ̆p bơyô rƀah bè tơrgùm wơl sră ờ gam ngui tai, tă pơgồp ào mpha, blơi lịch, dờp sur ù. Pah dơ̆ tus lồi nam Hìu bơsram ngui khà priă do nàng dong kờl ală gơ̆p bơyô kal ke. Oh gơ lơh chờ hờp ngan mờ kơ̆p kờñ Hìu bơsram geh dong kờl ală gơ̆p bơyô hơ̆ in uă rlau tai.

Jat bi Trần Doãn Tới, Chủ tịch Hội đồng Đội càr Dak Lak đơs, ờ mìng dong kờl ală oh kơnòm dềt kal ke lơm, srơh gam pơgồp bơnah bơto bơtê đội viên, kơnòm dềt in bơsram tàp bơta gĭt wă tềm pềr, kờñ lơh broă, sền gàr tiah ơm kis mờ nùs nhơm tam klăc bal, tàm dong tàm kờl bal, tam pà bal, dong kờl ală cau geh rài kis kal ke.

Bơh ală kĭ sră ờ gam ngui tai mờ ală lon dà lơngồt ală oh dờñ khòm geh den neh pơgồp bơnah tă pơgồp tai priă jền nàng lơh lila tai broă lơh in. Dơ̆ 2 là bơh ală broă lơh dềt bè hơ̆ ală oh pơgồp bơnah crơng gơs bơta gĭt wă is mờ bơh hơ̆ lơh gơs nùs nhơm, tam pà bal, gĭt tài bơh mpồl bơtiàn mờ dong kờl ală gơ̆p bơyô kal ke rlau mờ he. Uă kơnòm geh dờp mờ dờp geh bơta dong kờl bơh ală srơh sơnam dềt lơh broă dềt, hơ̆ là ală bơnah priă bơsram, ală bơta dong kờl bơh mpồl Đội tàm hìu bơsram mờ bơdìh mờ hìu bơsram dê.

Bơh kes priă bơh srơh Broă rơndap lơh dềt, uă hìu ơm, tiah nhơl lơh ai kơnòm dềt in, broă lơh măng non neh geh bơt bơtàu tàm Dak Lak. Srơh do neh cèng wơl cồng nha geh ngan, lơh geh tơl bơta dong kờl ai ală kơnòm bơsram geh rài kis kal ke in lòt bơsram.

Cau mblàng K’Hạnh