VOV4.K’ho- Ngai 27/9, ală Hìu bơsram tàm càr Dăk Nông neh wă kơnòm bơsram tus wơl hìu bơsram tơnơ̆ tơngai lơh jat broă lơh ai ơm yah ngài rcang sơndră kòp Covid-19. Jat hơ̆, gah bơto bơtê càr Dăk Nông ring bal ai ală hìu bơsram tàm 4 kơnhoàl: Dăk G’long, Dăk Song, Tuy Đức, Krông Nô mờ ƀòn dờng Gia Nghĩa wă kơnòm bơsram lòt bơsram wơl.

Ală kơnòm bơsram geh cau pơgru đo, was să jan lài mờ tŭ mut tàm hìu bơsram

Tŭ tus hìu bơsram, ală kơnòm bơsram pal geh đo, was să jan, rào tê mờ dà lơh kloh khuẩn. Ală hìu bơsram ờ bơyai lơh gờm chờ bùng bi bồ poh ala tàm hơ̆ cau pơgru atbồ ơdŭ bơto pơlam kơnòm bơsram in bè bơta chài rcang sơndră kòp, jơnau sồr rcang sơndră kòp bơh hìu bơsram dê. Tàm tơngai ơm tàm hìu bơsram, jơh bal kơnòm bơsram mờ cau pơgru pal pơn chèu glòm muh mat. Mìng is tàm kơnhoàl Cư Jŭt, tơnơ̆ tŭ sền gŏ cau bơtờp mờ virus Sars CoV-2 tàm xã Nam Dong tàm ngai 26/9, gah bơto bơtê neh ơm ing broă ai kơnòm bơsram tus hìu bơsram.

Cau mblàng K’Hạnh