VOV4.K’ho – Tàm [òn dờng Kontum, Tỉnh ủy, HĐND, UBND, Ủy ban Mặt trận dà lơgar Việt Nam càr Kontum yu\ rơyùm bơyai lơh tơngkah 105 nam  ngai crơng gơs càr Kontum (9/2/1913 – 9/2/2018). Càr Kontum ơm tàm tiah đah tô Tây Nguyên dê, ơnàng rlau 9 rbô 600 kơi sồ vuông, khà kờp làng bol geh rlau 500 rbô nă cau, mờ 6 jơi bơtiàn kòn cau ơm kis bơh jo\ tàm [òn lơgar mờ git nđờ jơt jơi bơtiàn kòn cau oh mi ơm kis bal. Sơr lèt gan 105 nam mờ uă dơ\ tam gơl bè nhàr ù tiah, mat sơnđan krơi is, mơya tàm tu\ tơngai lơi, làng bol ală kòn cau càr Kontum kung sùm brồ guh bơhìan kờ` gơboh dà lơgar, khin cha jak chài tàm dơ\ tam lơh dră wơl bol sò tơm; tryăng trỳông, bơceh pa tàm broă lơh sa, bơt bơtàu [òn tờm Kontum ngai sơlơ pas sơm, niam bơne\.

Tus nam 2017, kờp jơh tă dia dà lơgar in bơh càr dê geh rlau 2 rbô 200 tơmàn priă, khà gơguh lơh sa rlau 9%; priă lơh geh kờp bal tàm 1 nă cau geh mờr 35 tơlak priă; geh 13 xã tơl khà [òn lơgar pa, jơh ală xã ndrờm geh gùng rơndeh dờng in mut tus tiah tờm mờ geh gùng che ồs đèng dà lơgar. Càr lơh ngan lơh geh jơnau kờ` gơguh lơh sa tus nam 2020 là rlau 9%, priă lơh geh kờp bal tàm 1 nă cau geh rlau 2 rbô 500 đôlar, tă dia dà lơgar in rlau 3 rbô 500 tơmàn priă. Pơn jat tai tơnguh niam rài kis phan bơna mờ nùs nhơm bơh làng bol dê.

                Cau cih mờ yal tơnggit K’Duẩn