VOV4.K’ho- Kờp bơh 12 jiơ klo ngai ngai 19/7, càr Lâm Đồng sồr jơh ală cau măy rơndeh, cau drơng broă tàm rơndeh pơdiang phan bơna bañ rê tàm hìu bơnhă, pal ơm wơl tàm tiah tơrgùm bal bơh UBND ală kơnhoàl mờ ƀòn dờng càr dê rơndap ơm.

Lâm Đồng sồr ală cau măy rơndeh, cau drơng broă tàm rơndeh pơndiang phan bơna bañ rê tàm hìu bơnhă mờ mpồl tiah làng bol ơm kis

Gơwèt mờ cau măy rơndeh pơndiang phan bơna tàm ală càr, mìng ai gơnoar ală rơndeh pơn diang phan bơna kờñ pal geh, phan bơna drơng broă lơh sa, kă bro lơh broă mơya pal ngui ală broă lơh rcang sơndră kòp jat jơnau sồr bơh càr Lâm Đồng dê. Mờ cau măy rơndeh, cau drơng broă tàm rơndeh tŭ rê wơl tàm Lâm Đồng pal yal tiah lòt rê tàm anih gròi sền kòp Covid-19 mờ pal ơm wơl tàm tiah tơrgùm bal bơh UBND kấp kơnhoàl dê rơndap ơm. Bañ rê tàm hìu bơnhă, tiah làng bol ơm kis nàng tơrmù ƀà bơta pơhìn bơtờp kòp ai cau rềp bal mờ mpồl bơtiàn làng bol ơm kis in.

Cau mblàng K’Hạnh