VOV4.K’ho- Tơrgùm uă ngan mblàng yal bơh tŭ lam lơh, srơh “Jơh gùt làng bol tus bal rơcăng, sơndră kòp Kovid-19 mờ lik hờ lơgar ndai, mŭt tàm lơgar tìs mờ kơrnoăt boh lam” nàng kờñ tơnguh uă bơta gĭt wă, gĭt nền kơnòl bơh tơl nă cau dê tềng đăp bơta aniai ngòt rơngơ̆t bơh kòp Kovid-19 dê, mpồl ling sền gàr tiah nhàr lơgar neh hòi tơrgùm bơta pràn jơh gùt làng bol tus bal rơcăng, sơndră kòp Kovid-19 mờ lik hờ lơgar ndai, mŭt tàm lơgar tìs mờ kơrnoăt boh lam; pơgồp bơnah kơryan ờ lời kòp lơh bơtờp bơh đah mŭt bơdìh mŭt tàm lơgar mờ mpồl bơtiàn.

Jăt mờ hơ̆, broă lơh geh lơh bal mờ uă broă lơh geh kwơ ngan, loh làng ngan, dipal mờ bơta ù tiah ƀòn lơgar, gơjăt bal mờ ală srơh, dơ̆ hòi jà tàm ƀòn lơgar, lơh jăt ală jơnau sồr bè rơcăng, sơndră kòp Kovid-19. Mblàng yal nàng jơh tơl nă làng bol in geh bơta gĭt wă dipal, wil tơl bè bơta, khà ngòt rơngơ̆t bơh kòp Kovid-19 dê; Lam lơh broă lơh sền gàr ờdo ờdă rài kis mpồl bơtiàn, lòt bal mờ làng bol geh rài kis kal ke gơtìp gơrềng bơh kòp Kovid-19.

Là càr geh gơl gùng nhàr lơgar jòng rlau 468 kơi sồ rềp nhàr bal mờ lơgar gơ̆p bơyô Lào, geh uă gơl gùng kòn, broă gròi sền tiah nhàr lơgar, kơryan mŭt tàm lơgar tìs mờ kơrnoăt boh lam neh geh Mpồl ling sền gàr tiah nhàr lơgar càr Nghệ An lơh jăt dùl ròt, làm uă mờ geh cồng nha. Tàm hơ̆, sền gròi uă gùng dà broă lơh mblàng yal tus mờ làng bol tàm tiah nhàr lơgar in. Đại tá ồng Dương Hồng Hải là Phó Kwang đơng lam bồ Gah đơng lam Mpồl ling sền gàr tiah nhàr lơgar càr Nghệ An, pà gĭt: Bol añ lơh niam broă lơh mblàng yal tus tơl nă làng bol tàm tiah nhàr lơgar, pleh ală broă lơh tàm dong kờl lơh kòn gùng lam cau mŭt tàm lơgar tìs mờ kơrnoăt boh lam bơh lơgar Lào; Lơh ală thùng sră yă cau lơh tìs tàm ală ƀòn lơgar ơm rềp kềng gah gùng tiah nhàr lơgar, bol añ jàu ai oh mi Phó Ƀí thư Đảng ủy là kwang bàng ling sền gàr tiah nhàr lơgar tus tàm xã lơh broă lơh mpồl cau tờm tàm broă mblàng yal lam jơh gùt làng bol tus bal bè yal yă, gŏ ală cau sền gŏ ală cau mờ dô gan nhàr lơgar mŭt tàm ƀòn lơgar mờ ờ lơh geh jơnau tơl ală sră pơ àr jăt jơnau sồr.

Lòt bal mờ mpồl ling sền gàr tiah nhàr lơgar, uă ngan làng bol ală xã tiah nhàr lơgar kung tơnguh is jơnau gĭt wă tàm broă lơh rơcăng sơndră kòp Kovid-19 bè pơn chèu glòm muh măt tiah gal cau, lơh sàng goh, ƀồm sơnơm lơh kloh khuẩn gùt dar ù tiah ơm kis. Kwơmàng lơh gơnoar broă măt gŏ tồr kơno bơh Mpồl ling sền gàr tiah nhàr lơgar dê tŭ rơcăng gĭt wă jơnau gơlik geh, yal di tŭ tŭ gŏ ală cau mŭt tàm lơgar tìs mờ kơrnoăt boh lam tàm ƀòn lơgar. Tềng đăp bơta gơbàn ngai sơlơ kal ke bơh kòp Kovid-19, Mpồl ling sền gàr tiah nhàr lơgar càr Quảng Bình neh lơh anih gròi sền tàm gùng kòn, gùng pờ tàm gơl gùng tiah nhàr lơgar mờ lơgar gơ̆p bơyô Lào nàng kơryan cau bơh tiah kòp mŭt tàm lơgar he. Thiếu tá ồng Lê Ngọc Gia, Cíñ trị viên Pôs đồng Mpồl ling sền gàr tiah nhàr lơgar Làng Ho, Mpồl ling sền gàr tiah nhàr lơgar càr Quảng Bình pà gĭt, tàm bơta kal ke, cau ling geh bơta dong kờl bơh làng bol dê tàm tiah nhàr lơgar. Thiếu tá ồng Lê Ngọc Gia, đơs: Bol añ gơlơh chờ hờp ngan, bulah tàm gơl gùng tiah nhàr lơgar bơh mpồl ling drơng kơnòl, rài kis làng bol tìp uă kal ke mơya làng bol neh tă pơgồp phan bơna, nùs nhơm bal mờ làng bol. Tàm tơngai tus ngan ngồn bol añ geh lơh gơs niam kơnòl broă rơcăng sơndră kòp Kovid-19.

Mờ jơnau đơs “Tam dră mờ kòp bè tam dră mờ bol sò tơm”, ală cau ling mpồl ling sền gàr tiah nhàr lơgar càr Quảng Bình tàm ala gơ̆p drơng gàr 24/24 jiơ tàm ală anih gròi sền tàm ală gùng kòn, gùng pờ mờ lơgar gơ̆p bơyô Lào. Ală cau ling ờ gŏ ngòt bòl glar kal ke, ơm sa bĭc tơn tàm brê, ơm rlô bòl tơn tàm ală ơyun kơ̆t tàm chi brê. Mò Hồ Thủy là cau Vân Kiều ơm tàm ƀòn Ea Bù- Chút Mút, xã Lâm Thủy, kơnhoàl Lệ Thủy, càr Quảng Bình ngoh rơngăc yal, gŏ cau ling lơh anih gròi sền tàm gùl brê kròng tiah nhàr lơgar kal ke ngan den tàng làng bol dong kờl, bơtơl tai bơta pràn dong ală cau ling lơh gơs kơnòl broă. Mò Hồ Thủy, đơs: Dilah gŏ cau krơi lòt rê gan tiah nhàr lơgar den bol añ geh yal mờ mpồl ling sền gàr tiah nhàr lơgar nàng ală bi in gĭt geh jơnau gơlik geh mờ kơryan di tŭ. Bal mờ cau ling rơcăng sơndră kòp Kovid-19 ờ gŏ di mŭt tàm thôn ƀòn bơh he dê.

Mpồl dờp rò làng bol mŭt tàm lơgar tàm Mpồng nhàr lơgar dunia Cha Lo, càr Quảng Bình pà gĭt, nàng gròi sền niam mpồl cau lòt rê tàm ală tiah nhàr lơgar, Gah đơng lam Mpồl ling sền gàr tiah nhàr lơgar càr Quảng Bình neh lơh 14 anih gròi sền tơn tàm gùng kòn, gùng pờ mờ lơgar gơ̆p bơyô Lào. Đại tá ồng Trịnh Thanh Bình là Kwang đơng lam bồ Mpồl ling sền gàr tiah nhàr lơgar càr Quảng Bình pà gĭt, bal mờ broă lòt sền gròi sền, Mpồl ling sền gàr tiah nhàr lơgar càr Quảng Bình sùm hòi jà làng bol tiah nhàr lơgar tàm sơm băt tê bal rơcăng, sơndră kòp Kovid-19. Đại tá ồng Trịnh Thanh Bình, đơs: Ală mpồl gròi sền geh gròi sền kràñ ngan, kơ̆ kơl jăp cau lòt sền jăt tiah nhàr lơgar. Bal mờ hơ̆ den pơgồp bal broă lơh hòi jà làng bol ƀòn lơgar tơnguh uă bơta gĭt wă bè broă lơh rơcăng, sơndră kòp mơkung pà chèu glòm muh măt mờ lơh sàng goh ală thôn ƀòn.

Tàm tŭ uă ngan làng bol kis tàm tiah nhàr lơgar tàm sơmbăt tê bal mờ mpồl ling sền gàr tiah nhàr lơgar ring lơngai, pơgồp bơnah rơcăng sơndră kòp Kovid-19, den kung gam geh sơl ală cau sơmờm gơnăp gơnoar mờ kơnòl bơh he dê, nàng dong kờl dùl nse bal mờ ală cau ờ niam. Ngan ngồn bol he gam kah rềp ndo, mpồl cau lam 200 nă cau lik lòt hờ lơgar ndai mờ mŭt tàm lơgar tìs mờ kơrnoăt boh lam lòt gan tiah nhàr lơgar Bản Lầu, tàm kơnhoàl Mường Khương, càr Lào Cai gơtìp gŏ, geh uă tai broă lơh rơlăc rơliang ngan bơh ală cau dê neh geh lơh loh. Pal sền ngăc là cau lam bồ dong kờl ală cau uă dơ̆ lam cau dô gan nhàr lơgar gơtùi là gơlik tus wơl là Cau ătbồ thôn, là cau să tờm tơn tus bal lòt sền gròi sền kòp Kovid-19 bal mờ mpồl ling sền gàr tiah nhàr lơgar.

Den tàng bè hơ̆, gơtùi đơs nền là, dilah să tờm tơl nă làng bol tơn ờ gŏ gĭt wă dipal, wil tơl bè bơta mờ khà ngòt rơngơ̆t bơh kòp Kovid-19 dê gơwèt mờ să tờm mờ mpồl bơtiàn den bulah mpồl ling sền gàr tiah nhàr lơgar geh rbô nơm mat, tơlak nơm tồr, geh lơh gĭt nđờ rhiang rbô anih gròi sền tàm ală gùng kòn, gùng pờ den kung ờ jai kơryan geh jơh ală jơnau jòi kai bơh ală cau do dê, mpồl cau jun lam, rò cau lik lòt hờ lơgar ndai, mŭt tàm lơgar tìs mờ kơrnoăt boh lam.

Cau cih VOV4- Cau mblàng Lơ Mu K’Yến