VOV4.K’ho- Tŭ do, cau tam sầu riêng tàm kơnhoàl Krông Păk, càr Dăk Lăk neh mut tàm kàl tờm tơnhàu sầu riêng. Sầu riêng tơnhàu geh uă mơya priă tac gơmù lơyah ngan, lơh cau tam sầu riêng moat jrùm ngan.

Ồng Tạ Văn Châm, Phó Chủ tịch Ủy ban Nhân dân xã Ea Yông pà git, gùt xã geh 2 rbô lồ sầu riêng, tàm hơ̆ geh 1 rbô lồ neh gơtùi tơnhàu. Khà tơnhàu kàl do kờp dŭ geh rlau 20 rbô tấn, geh nggùl khà sầu riêng gùt kơnhoàl dê. Lài do geh nam sầu riêng Dona gơguh khà priă tac tus 80 rbô đông tàm 1 kĭ, nam lài tàm khà bơh 40 tus 45 rbô đông. Nam do bồ kàl, sầu riêng J6 kung tac geh khà priă rlau 30 rbô đông. Tŭ do, sầu riêng Dona neh dum uă, mơya cau tac bro den ờ huan kờñ blơi. Geh tŭ, 2, 3 suơn neh lơh nền khà priă hơ pơrgon tac rlau 40 rbô đông, mơya tŭ do pal tơrmù gam 25 rbô đông, geh tŭ lơyah rlau hơ̆ sồng gơtùi tac: “Tŭ do den sầu riêng mut tàm kàl tơnhàu mơya tài kòp Covid-19 den tàng anih tơlik tac sầu riêng bơh cau lơh broă sa xã Ea Yông kal ke ngan tài ờ gơtùi tac hờ lơgar ndai. Cau tac bro ờ blơi halà blơi dùl êt ngan. Khà priă tac tŭ do den gơmù lơyah, mìng gam bơh 18 tus 25 rbô, gơ jat tàm tơl bơta plai niam”.

Cau tam sầu riêng Krông Păk gam pic sầu riêng

Jat kờp dŭ bơh ồng Y Ngắc Niê, Chủ tịch Mpồl cau lơh broă sa xã Ea Yông den kàl do, cau lơh broă sa tàm xã roh rlau 400 tơmàn đông, tài khà priă tac sầu riêng mìng ndrờm nggùl mờ nam lài: “Sầu riêng bơh làng bol dê tŭ do neh tus tơngai tơnhàu, dum mờ gơ jrùh, khà priă tac tŭ do den gơmù sùm, lơyah ngan. Tus tŭ do den tam gơl bơh 20 tus 25 rbô đông dùl kĭ”.

Bol hi lòt tus suơn ồng Y Suông Niê ơm tàm ƀòn Jung. Tàm do, rlau 10 nă cau gam pic sầu riêng, ơn bềng tàm rơndeh lơ òr nàng pơndiang tus hờ anih blơi. Ồng Y Suông pà git, hìu bơnhă neh tac 7 tấn, mìng is ngai do pic geh 2 tấn. Khà priă sầu riêng tàm suơn tam pà gơs 3 bơta, lơyah ngan rlau jơh là 18 rbô, 22 rbô mờ 25 rbô đông.

Uă mpồl lơh sa kă bro bơcri priă măi mok lơh gơlik phan, prap gàr sầu riêng mờ anih lơh mrềt nàng tac hờ lơgar ndai

Bol hi lòt tus Kong ti Cổ phần Thương mại xuất nhập khẩu Dũng Thái Sơn tàm thôn 4, xã Ea Kênh. Do là Kong ti blơi sầu riêng dờng ngan rlau jơh tàm kơnhoàl Krông Păk. Ồng Lê Viết Chiến, Phó Kuang atbồ kong ti yal: kơnờm rềp ndo kong ti neh bơcri priă nàng lơh tai anih lơh mrềt den tàng pah ngai gơtùi lơh gơlik rlau 20 tấn phan. Kong ti gam lơh ngan blơi sầu riêng làng bol in. Mơya tài kòp Covid-19, broă pơndiang, tac hờ lơgar ndai kal ke ngan. Ồng Chiến pà git, tŭ do kong ti ờ hềt gơtùi tac hờ lơgar ndai bè pah nam, phan lơh gơs uă ngan là tac tàm ƀòn dờng Hồ Chí Minh mờ ală càr tiah đah jum mat tơngai mut dà lơgar den tàng khà blơi kung gơmù sơl, mìng pơgap 7 rbô 500 tấn, ndrờm nggùl mờ nam lài: “Kờp dŭ kong ti blơi, lơh gơlik 15 rbô tấn plai. Mơya tài kòp bơtờp, tài broă tac lơyài, pơndiang lơyài, bal mờ hơ̆ den priă bơcri ờ uă. Den tàng kờp dŭ khà lơh gơlik digơlan pơgap 50% broă rơndap lơh bơh sơn rờp”.

Cau mblàng K’Duẩn