VOV4.K’ho- Drim ngai 26/9, Đoàn ơruh pơnu Kuang àng càr Dăk Lăk pơgồp bal mờ ală mpồl dong kờl neh tus còp mờ pà phan ală mpồl lơh broă lam lài sơndră kòp. Mpồl neh tus còp mờ jàu 200 kơldung phan gàr tơl niam rài kis mpồl bơtiàn, phan bơna sơnơm tơm ba gah lơh sơnơm dê mờ ală phan ngui sa kờñ pal geh ai Kuang àng thị xã Buôn Hồ mờ làng bol kal ke tàm ù tiah thị xã dê in. Tơl kơldung phan gàr tơl niam rài kis mpồl bơtiàn kờp priă geh pơgap 1 tơlak đong, tàm hơ̆ geh 5 kĭ phe, tơngi, dà màm, sơnơm tơrmù kòp duh să, chèu sơnơm; kem chzio sề, sơbong pìh phan, biăp, bùm, plai đo, tăp iar mờ ka ris.

Kuang àng càr Dăk Lăk pà phan ală anih gròi sền rcang sơndră kòp Covid-19 in

Bal mờ hơ̆, mpồl gam tus còp mờ pà phan gĭt nđờ rơhiang phan coh gàr să jan gah lơh sơnơm, chèu glòm muh mat, dà rào tê lơh kloh khuẩn, phan sa, dà hùc ai ală kuang bàng, cau ling mờ cau gam lơh kơnòl broă tàm Hìu sơnơm thị xã Buôn Hồ, Kuang àng kơnhoàl Krông Buk mờ ală anih gròi sền rcang sơndră kòp bơh xã Pơng Đrang (Krông Búk) mờ xã Ea Hồ (Krông Năng).

Cau mblàng K’Hạnh