VOV4.K’ho- Ngai 26/7, Bộ Tư lệnh mờ Kuang àng ƀòn dờng Hồ Chí Minh dơ̆ lĕ bal ai ling pơgồp bal lơh kơnòl broă lòt sền, gròi sền broă lơh jat ală jơnau sồr bè rcang sơndră kòp tàm ù tiah do dê.

Jat hơ̆, ală mpồl lơh broă lam lơh pơgồp bal bơh 4 jiơ mho ngai 26/7/2021 mờ lơh broă jơh ngai mờ mang, tàm 12 anih gròi sền kòp, anih mpồng mut mờ 90 anih gròi sền kòp tàm ală tiah tờm. 450 nă Kuang bàng, cau ling gơwèt Trung đoàn Gia Định mờ Tiểu đoàn gròi sền ling klàng 31, Bộ tư lệnh ƀòn dờng Hồ Chí Minh pơgồp bal mờ gĭt nđờ rơhiang nă kảnh sát gùng lòt, hình sự, 113 mờ cơ động gơwèt Kuang àng ƀòn dờng Hồ Chí Minh nàng ai cau lơh broă tàm anih gròi sền kòp mờ tơnguh khà dơ̆ lòt sền, sền gròi tàm ală gơl gùng. Dơ̆ pơgồp bal lơh broă do, Kuang bàng, cau ling Ling klàng dong kờl mpồl Kuang àng tàm broă ai hiệu lệnh sồr cau ơm, rơndeh rơndồ gam lòt tàm gùng, gròi sền ală jơnau yal nàng sền gĭt gơwèt di mờ mpồl, mờ cau, rơndeh rơndồ geh gơnoar lơh broă tàm tơngai lơh jat Chỉ thị sồ 16; dilah sền gŏ lơh tìs den cribơyai bal mờ mpồl Kuang àng lơh sră nggal lơh glài jat jơnau sồr bơh adat boh lam dê.

Cau mblàng K’Hạnh