VOV4.K’ho - Mho òr (21/10), tàm Anih tờm Pờ tơlik jơnau đơs Dà lơgar, sồ 58 gùng Quán sứ, ƀòn dờng Hà Nội, Ủy viên Đảng dà lơgar, Kuang atbồ Anih jơnau đơs Việt Nam ồng Đỗ Tiến Sỹ neh wă Mpồl kuang atbồ Anih lơh broă ala măt lơgar Việt Nam tàm lơgar bơdìh geh Thứ trưởng Bộ Ngoại giao ồng Vũ Quang Minh lam bồ, tus còp mờ lơh broă.

Tàm dơ̆ lơh broă, Kuang atbồ Anih jơnau đơs Việt Nam ồng Đỗ Tiến Sỹ chờ gờm ală Kuang atbồ anih lơh broă ala măt lơgar Việt Nam tàm lơgar bơdìh geh pồ di tàm ală anih lơh broă kuơ màng. Ồng Đỗ Tiến Sỹ kung neh yal tơrgùm bal bè Anih jơnau đơs Việt Nam, bè broă pơgồp bal đah Anih jơnau đơs Việt Nam mờ Bộ Ngoại giao, ală Đại sứ quán mờ Tổng lãnh sự quán Việt Nam tàm ală lơgar tàm broă yal tơngit lam sồr. tàm tơngai tus, Anih jơnau đơs Việt Nam kơ̆p kờñ ngan geh lơh broă bal nền nòn rơlao tai mờ ală anih lơh broă ala măt lơgar Việt Nam tàm lơgar bơdìh tàm broă lơh jăt ală broă rơndăp lơh yal tơngit jơnau mờ lơgar bơdìh nàng yal uă bè rùp rài dà lơgar, kòn bơnus lơgar Việt Nam tus mờ dunia, kung bè pờ ơnàng broă lơh git gơ̆p, lơh broă bal mờ ală gah lơh broă lơgar bơdìh tàm gah pờ tơlik jơnau đơs, sơnđio rùp.

Cau mblàng Ndong Brawl