VOV4.K’ho- Di ngai Kơnràñ lik lìng nam 2021, ngai 17/12, tàm càr Nam Định, Ƀí thư Đảng dà lơgar, Kuang atbồ Ƀan Dân vận dà lơgar mò Bùi Thị Minh Hoài neh lòt còp, nting bơr gờm chờ Giám mục Vũ Đình Hiệu mờ ală cau kơ đơng broă yàng, cau duh broă yàng Bàp Tòa Giám mục Giáo phận Bùi Chu tàm xã Xuân Ngọc, kơnhoàl Xuân Trường, càr Nam Định.

Ala mat kuang đơng lam bồ Đảng, dà lơgar, Mặt trận dà lơgar Việt Nam, mò Bùi Thị Minh Hoài nting bơr gờm chờ Giám mục Bùi Chu Vũ Đình Hiệu bal mờ jơh ală cau kơ đơng yàng, cau duh broă yàng, làng bol jat yàng Bàp wă rò ngai Noel lơngap lơngai, wă rò nam pa 2022 pràn kơldang, chờ hờp, gơboh gơbài. Giám mục Vũ Đình Hiệu pơyua jơnau ưn ngài kuang đơng lam bồ Đảng, dà lơgar, ală mpồl lơh broă cíñ trị, mpồl bơtiàn, gơnoar atbồ tàm tiah do neh sùm sền gròi, lơh gơlik bơta niam ai ală broă lơh niam chài, khat gơboh pin dờn bơh làng bol jat yàng Bàp tàm Giáo phận Bùi Chu dê kung bè làng bol jat yàng Bàp tàm gùt lơgar.

Cau mblàng K’Duẩn