VOV4.K’ho- Drim ngai 15/10, Kuang atbồ Ban Kinh tế dà lơgar ồng Trần Tuấn Anh neh wă mờ lơh broă pờ tơn tàm internet mờ Mpồl kuang bàng mpồl duh broă kă bro lơgar Mỹ mờ mpồl ASEAN (USABC).

Tàm dơ̆ lơh broă, 2 gah neh cribơyai ală broă bè thể chế, broă lơh bơtàu tơnguh lơh sa- mpồl bơtiàn bơh lơgar Việt Nam dê, ală jơnau dan, jơnau sồr tàm ală gah mờ ală mpồl lơh sa kă bro lơgar Mỹ sền gròi bè lơh sơnơm, năng lượng, lơh sa suơn sre, priă jền, lơh sa số, khoa học công nghệ, broă dong kờl mpồl lơh sa kă bro bơtàu tơnguh wơl mờ bơtàu tơnguh tơnơ̆ kòp dờng...

Ồng Trần Tuấn Anh sồr ală mpồl lơh sa kă bro lơgar Mỹ pơn jat tai rề ơnàng rlau tai broă lơh kă bro bơcri priă tàm lơgar Việt Nam, lơh broă bal mờ ală mpồl lơh sa kă bro lơgar Việt Nam tàm ală gah mờ đah lơgar Mỹ geh bơta pràn mờ Việt Nam geh jơnau kờñ, tă pơgồp tàm broă bơtàu tơnguh wơl lơh sa tơnơ̆ kòp dờng. Mpồl kuang bàng bơh Mpồl duh broă kă bro lơgar Mỹ mờ mpồl ASEAN dê đơs nền jơnau hơ pơrgon geh pơn jat tai lòt bal mờ pơgồp bal jơh nùs mờ Đảng, Chính phủ Việt Nam, jơh nùs chồl pràn git gơp lơh broă bal lơh sa- kă bro- bơcri priă đah lơgar Mỹ mờ Việt Nam ngai sơlơ bơtàu tơnguh.

Cau mblàng K’Duẩn