VOV4.K’ho - Ồng Phan Đình Trạc, Kuang atbồ Ban Nội chính Dà lơgar bal mờ Mpồl kuang bàng ala măt Quốc hội càr Lâm Đồng pa geh dơ̆ tìp mờ cau tĕ khà tàm xã Hiện An, kơnhoàl Đức Trọng mờ ờ uă sơnah ƀòn, xã tàm ƀòn dờng Dà Làc.

                            Mpồl kuang bàng ala măt Quốc hội càr Lâm Đồng tìp mờ cau tĕ khà

Tàm ală dơ̆ tìp, cau tĕ khà tơlik nùs nhơm pin dờn mờ kơ̆p kờñ tàm ală broă lơh tàm broă chồl pràn broă tơnguh bơtàu broă lơh sa mpồl bơtiàn, broă sơrlèt mờ kal ke tài kòp Covid-19 bơh Chính phủ, bơh Quốc hội bơh pơrjum dơ̆ 2 Quốc hội khoă 15 dê. Mờ pơn jăt tai dan mờ uă broă gơrềng bal tus mờ broă atbồ dà lơgar tàm ală gah broă, ală broă lơh rài kis mpồl bơtiàn mờ rơndăp broă chồl pràn lơh sa kă bro tàm bơta bè ờs pa. Đơs tềng đăp mờ cau tĕ khà, ồng Phan Đình Trạc, Kuang atbồ Ban Nội chính Dà lơgar đơs tờm, ală jơnau đơs, jơnau dan mờ jơnau pơgồp bal bơh cau tĕ khà ndrờm là ală jơnau niam, jơnau kơ̆p kờñ di pal. Mpồl kuang bàng ala măt Quốc hội càr Lâm Đồng geh kơlôi sơnơng nền nòn, dờp mờ sồr ală anih lơh broă geh gơnoar in sền sơwì, jòi geh gùng dà broă bơsong tàm tơngai tus.

Cau mblàng Ndong Brawl