VOV4.K’ho- Drim ngai 08/10, tàm kơnhoàl Châu Thành, càr Tây Ninh, ồng Nguyễn Trọng Nghĩa, Bí thư Đảng dà lơgar, Kuang atbồ Ban Tuyên giáo dà lơgar, kuang bàng Quốc hội càr Tây Ninh geh dơ̆ tìp mat cau tĕ khà tàm kơnhoàl lài mờ pơrjum dơ̆ 2, Quốc hội khóa 15.

Tàm dơ̆ tìp mat, kuang bàng Quốc hội mò Hoàng Thị Thanh Thúy, Phó Kuang atbồ mpồl kuang bàng Quốc hội càr Tây Ninh yal bè broă rơcang sơndră kòp Covid-19 tàm càr. Jat hơ̆, tàm Tây Ninh, kòp Covid-19 neh geh sền gròi mơya ờ hềt kơ̆, khà cau bơtờp kòp tàm mpồl bơtiàn kung gam; tŭ do, càr gam chồl pràn broă cit sơnơm vaccine, lam lơh niam ală broă lơh dong kờl, ală rơndap broă dong kờl mpồl lơh sa kă bro bơtàu tơnguh wơl lơh sa...

Cau tĕ khà dan, pal tơnguh broă lơh mblàng yal nàng làng bol in gŏ loh bơta gơ rềng kơn jơ̆ ngan bơh kòp dê mờ geh jơnau git wă rlau. Tàm broă dong kờl ală cau gơtìp gơ rềng tài bơh kòp Covid-19 den pal rề ơnàng rlau tai, pal hòi jà bơta tă pơgồp bơh mpồl bơtiàn tàm broă blơi sơnơm vaccine nàng mhar bơtàu tơnguh wơl lơh sa.

Cau mblàng K’Duẩn