VOV4.K’ho- Rlau 10 nam lơh kuang atbồ thôn, ồng A Bưn kòn cau Bahnar ơm tàm ƀòn Kon Tum Kơ Pâng, sơnah ƀòn Thắng Lợi, ƀòn dờng Kon Tum, càr Kon Tum sùm jơh nùs hòi jà làng bol bơt bơtàu rài kis niam chài tàm ƀòn ơm kis, pơgồp bơnah gàr kơ̆ mpồl tam klac dờng jơh gùt làng bol. Ồng kung là cau pơn rơ bè lơh broă, lơh sa jak.

Ồng A Bưn kơlôi sơnơng, mìng geh lơh ngan jơh pràn tàm lơh broă den hơ̆ sồng gơtùi dong broă lơh sa bơtàu tơnguh. Nàng gơtùi lơh bè hơ̆, să tờm pal ngai sơlơ bơsram, prap gàr mờng chài mờ ngan là tam gơl bồ tơngoh kơlôi sơnơng lơh sa, git tam sơngka sền gàr chi tam, tam bơrlŭ, tam gơl rơndap sap sèng chi tam dipal jat kàl lơh sa.

Nam 2019, tŭ khà priă ca gơguh jơnhua, ồng neh khin cha tam gơl 6 sàu ù tam bùm blàng nàng tam ca. Tơnơ̆ 8 nhai tam, sơngka sền gàr, hìu bơnhă ồng geh mờr 200 tơlak đông bơh broă tac ca ris. Tàm tơngai kơp pic 5 sàu kơphe, 3 lồ bời lời, ồng tam bơrlŭ bùm blàng, prìt mờ kòi nàng geh priă jền sùm. Bơh priă jền tềm pềr geh, hìu bơnhă ồng blơi rơndeh dờng pơndiang phan lơh gơs bơh suơn sre làng bol in. Tơnơ̆ tŭ kờp jơh ală bơnah priă, priă lơh geh kờp bal pah nam hìu bơnhă dê geh bơh 250 tus 300 tơlak đông. Ồng A Bưn yal “Tŭ lơi kung pal lòt lài, bơh lơh sa suơn sre tus tàm dong kờl bal mờ gơp. Añ kung sùm hòi jà oh mi ƀòn lơgar, añ pal lơh lài, oh mi làng bol jat tơnơ̆ nàng gàr kơ̆ nùs nhơm tam klac bal mờ gơp, đềt mềr bal mờ gơp nàng tơn jơh jơgloh tơrmù rƀah”.

Ồng A Bưn tàm dùl pơrjum yal cau pơn rơ lơh sa jak

Bơh krơh ồng A Bưn lơh sa jak, srơh tàm pơrlòng lơh broă, lơh sa tàm ƀòn Kon Tum Kơ Pâng sơlơ geh lam lơh uă. Ƀòn geh 365 hìu bơnhă, rlau 1 rbô 500 nă cau bal mờ mờr 80% làng bol jơi bơtiàn kòn cau dùl êt nă cau ơm kis. Lơh ngan bơtàu tơnguh lơh sa bơh tơl hìu bơnhă làng bol dê neh dong priă lơh geh kờp bal tàm dùl nă cau tàm tiah do geh rlau 27 tơlak đông pah nam. Lơh sa hời rơhời bơtàu tơnguh, kơ̆ kơljap, làng bol sơlơ tam klac, đềt mềr, pơgồp bal bơta pràn bơt bơtàu rài kis niam chài tàm ƀòn lơgar.

Ồng Nguyễn Văn Hùng, Chủ tịch Ủy ban Nhân dân sơnah ƀòn Thắng Lợi, ƀòn dờng Kon Tum, càr Kon Tum pà git tai “A Bưn là kuang atbồ thôn Kon Tum Kơ Pâng neh rlau 10 nam. Nam lài, làng bol kung pin dờn pồ wơl ồng lơh kuang atbồ thôn tơngai bơh nam 2020 tus nam 2022. Tàm tơngai lơh broă, A Bưn jơh nùs ngan, ngac ngar tai, kuơmàng là broă mblàng yal, hòi jà làng bol lơh jat tam gơl rài kis tiah drà, lơh gùng bêtông. A Bưn kung là 1 tàm 10 nă cau geh pơn rơ jak nàng làng bol in đòm jat”.

Tryăng tryồng tàm lơh broă, ngac ngar tàm lơh sa neh dong ồng A Bưn tàm ƀòn dờng Kon Tum geh hìu đam dờng niam, rài kis hìu bơnhă chờ hờp, gơboh gơbài. Mờ bồ tơngoh kơlôi sơnơng jak chài mờ ală tă pơgồp ai ƀòn lơgar in, ồng A Bưn là krơh niam bè tàm pơrlòng kờñ gơboh dà lơgar nàng làng bol in bơsram mờ đòm jat.

Cau mblàng K’Duẩn