VOV4.K’ho- Tềng đăp bơta gơbàn kal ke bơh kòp Covid-19 dê, càr Lâm Đồng sồr kuang bàng, công chức, viên chức mờ cau lơh broă tàm ală sở, ƀan, ngành mờ anih lơh broă tàm càr pal lơh jăt broă lơh xét nghiệm 03 ngai dùl dơ̆. Ngai 23/11, càr Lâm Đồng pơn jăt tai gŏ tai 171 nă cau bơtờp kòp Covid-19 pa, tơnguh jơh khà cau kòp tàm càr tus 2 rbô 154 nă. Khà cau bơtờp kòp gơguh mhar kờp bơh tŭ càr ờ huan lơh kràñ ală broă lơh ơm yah ngài mpồl bơtiàn.

Làng bol tus lơh sră xét nghiệm tàm Anih tờm gròi sền kòp tê jê să càr Lâm Đồng

Jăt jơnau đơs bơh Ủy ƀan Nhân dân càr Lâm Đồng dê, jơnau lơh kòp Covid-19 gơguh uă mìng là tài bơh làng bol bơh ală càr, ƀòn dờng tiah geh kòp tus tàm Lâm Đồng lơh bơtờp bơta gơdram kòp, geh sùm jơnau pơhìn lơh bơtờp kòp tus tàm uă tiah. Nàng lơh jăt niam “jơnau kờñ dơ̆ lĕ bal” rơcăng sơndră kòp geh cồng nha, sền gàr ờdo ờdă pràn kơldang să jan, màng kis làng bol dê mờ bơtàu tơnguh lơh sa- mpồl bơtiàn, Ủy ƀan Nhân dân càr Lâm Đồng sồr ală anih lơh broă, ală tiah, sở, ngành tàm càr lơh jăt broă xét nghiệm mhar ai ală kuang bàng, công chức, viên chức mờ cau lơh broă in 03 ngai dùl dơ̆. Mơkung sồr ală mpồl cau, cau dùl nă să is tus lơh broă pal cĭt tơl khà ding vaccine mờ xét nghiệm ờ bơtờp kòp tàm tŭ tơngai sồr.

Cau mblàng Lơ Mu K’Yến