VOV4.K’ho - Di tơngkah 35 nam ngai cau pơgru Việt Nam, Ủy ban chài rơ gơi bơ to bơsram, ơruh pơnu, kơ nòm pa tàu mờ kơ nòm dềt bơh Quốc hội dê bơyai lơh dơ\ tìp mat ală cau ala mat là cau pơgru, lài do là cau pơgru.

Thủ tướng Chính phủ Nguyễn Xuân Phúc mờ Chủ tịch Quốc hội, mò Nguyễn Thị Kim Ngân neh tus bal dơ\ tìp mat. Boh bơr mờ ală cau ala mat, Thủ tướng Chính phủ đơs là, khat dùl mpồl bơtiàn lơi kờ` bơtàu tơnguh den bơngă bơh bơ to bơtê mờ bơsram mờ bơngă bơh cau pơgru dê là kuơ màng ngan.

Ală cau pơgru pal rơcang lài nùs nhơm nàng tă pơ gồp ai broă lơh bơt bơtàu dà lơgar in. Tàm tơngai tu\ do, dunia gam geh ală bơta tam gơl pràn ngan, dilah ờ tam gơl pa, gah bơ to bơtê mờ bơsram bơh Việt Nam dê ngan là ờ geh cồng nha.

Đơs tàm dơ\ tìp mat, Chủ tịch Quốc hội, mò Nguyễn Thị Kim Ngân pơyua tus jơh ală cau pơgru, ală cau gam lơh broă atbồ bè bơ to bơsram tàm gùt lơgar ală jơnau nting sap gờm chờ niam ngan rlau jơh, ală nùs nhơm sền ngềr bơh Quốc hội Việt Nam dê mờ kuang đơng lam bồ Đảng, dà lơgar dê.

                Cau cih  mờ yal tơnggit K’ Duẩn