VOV4.K’ho- Kơnhoàl Đăk Tô pal đơng lam ală mpồl lơh broă chính trị, mpồl cau lơh broă bal tàm broă lơh mblàng yal, lam sồr làng bol rơcang sơndră kòp bơtờp. Do là jơnau đơs đơng lam bơh Phó Chủ tịch Ủy ban Nhân dân càr Kon Tum mò Y Ngọc tơnơ̆ tŭ lòt sền broă lơh rơcang sơndră kòp bơtờp tàm kòn bơnus tàm kơnhoàl Đăk Tô, là tiah geh khà cau gơbàn kòp sốt xuất huyết uă ngan rlau jơh càr mờ 22 nă cau gơbàn kòp tàm khà 33 nă cau gơbàn kòp do tàm gùt càr bơh bồ nam tus tŭ do.

Kuang đơng lam bồ Ủy ban Nhân dân kơnhoàl Đăk Tô pà git tai, bơdìh mờ 22 nă cau gơbàn kòp sốt xuất huyết, kơnhoàl do neh geh 69 nă cau gơbàn kòp thủy đậu. Tŭ do, kơnhoàl Đăk Tô neh mờ gam chồl pràn lam lơh ală broă lơh rơcang sơndră kòp bơtờp đơs bal, kòp sốt xuất huyết mờ kòp jơng tê bơr đơs is. Mìng is gơ wèt mờ broă lơh rơcang sơndră kòp Covid-19, ală xã, thị trấn tàm kơnhoàl Đăk Tô neh crơng gơs ală mpồl lòt sền, sền gròi, đơng lam broă lơh rơcang sơndră kòp tàm ală tiah geh uă kòp, ală tiah pơhìn gơbàn uă kòp.

Cau mblàng K’Duẩn