VOV4.K’ho- Drim ngai 29/7, tàm Hìu lơh broă Chủ tịch, ồng Nguyễn Xuân Phúc- Chủ tịch lơgar wă ồng Lloyd Austin- Bộ trưởng Quốc phòng lơgar Mỹ gam geh dơ̆ còp ngan ngồn lơgar Việt Nam jat jơnau jà bơh Đại tướng ồng Phan Văn Giang, Bộ trưởng Bộ Quốc phòng Việt Nam dê. Ala mat Dà lơgar mờ làng bol Việt Nam, ồng Nguyễn Xuân Phúc ưn ngài lơgar Mỹ neh dong kờl Việt nam in khà uă ngan sơnơm vaccine rcang sơndră kòp Covid-19; đơs niam ngan cồng nha tìp mat cribơyai đah Bộ trưởng Quốc phòng lơgar Mỹ ồng Lloyd Austin mờ  Bộ trưởng Quốc phòng Việt Nam ồng Phan Văn Giang; 2 gah neh ring bal geh uă tơngume lơh broă bal kuơ màng tàm tơngai pơn jat tai.  Bộ trưởng Quốc phòng lơgar Mỹ ồng Lloyd Austin kung đơs ngan Mỹ geh lơh pràn rlau tai lơh broă bal mờ Việt Nam nàng bơsong jơnau gơ lời wơl bơh rài tam lơh; bơh hơ̆ sùm bơt bơtàu mờ lơh niam wơl bơta pin dờn đah 2 lơgar dê.

Wă Bộ trưởng Quốc phòng lơgar Mỹ ồng Lloyd Austin, Thủ tướng Chính phủ ồng Phạm Minh Chính jờng rơ dơ̆ lòt còp Việt Nam bơh Bộ trưởng Quốc phòng lơgar Mỹ dê, kơ̆p kờñ tơnguh bơta gĭt gơ̆p lơh broă bal tơl làm mờ Mỹ jat tàm bơnàng jă 2 gah geh kuơ bal, tài bơta ring lơngai, kơ̆ kơljap mờ bơtàu tơnguh tàm tiah do mờ tàm dunia. Thủ tướng đơs ngan lơh broă bal lơh sa đah 2 lơgar gam uă bơta pràn nàng bơtàu tơnguh, mờ sồr 2 gah lơh broă bal niam rlau tai tàm tơngai tus, ngan là tơnguh ală gah broă mờ Mỹ geh bơta pràn mờ Việt Nam geh bơta ƀuơn bè phan bơna, gùng lòt, mpồl cau lơh broă, năng lượng lơh gơlik wơl.

Cau mblàng K’Hạnh