VOV4.K’ho - Di tơnkah 80 nam ngai ờs mờng cau dờng sơnam lơgar Việt Nam (06/06), mho òr (04/06), UBND càr Dak Nông neh tus còp, pà bơkào mờ chờ gờm Mpồl cau dờng sơnam càr Dak Nông.

UBND càr đơs niam ală broă pơgồp bal bơh mpồl kuang bàng, cau tàm mpồl cau dờng sơnam tàm tơngai do, ờ mìng lam lài ai ală oh kòn, kòn sao in bơsram jăt bal tàm ală gah broă mờ gam tus bal lơh, ai tơngai bơ̆t bơtàu ƀòn lơgar ngai sơlơ tơnguh bơtàu. UBND càr kơ̆p kờñ mpồl kuang bàng, cau tàm mpồl cau dờng sơnam sùm pràn kơl dang, pơn jăt tai ai broă lơh, tơngai lơh broă, tàm hơ̆ uă ngan là tus bal mờ broă “Sơnam dờng bơta ngăc ngar sơlơ uă, lam lài tàm broă bơ̆t bơtàu mờ sền gàr Dà lơgar”.

Tàm dơ̆ tìp, Chủ tịch Mpồl cau dờng sơnam càr neh ưn ngài broă sền gròi bơh kuang đơng lam càr tàm broă drơng gàr cau dờng sơnam in. Mpồl cau dờng sơnam càr pơn jăt tai tơnguh nùs nhơm, bal mờ càr tàm ală broă pơrlòng kờñ gơboh mờ dà lơgar, tàm hơ̆ uă ngan là broă bơto bơtê rơnàng kơnòm să in.

Cau mblàng Ndong Brawl