VOV4.K’ho - Di tơnkah 74 nam ngai Cau ling sồt să, cau ling chơ̆t màng (27/7/1947 – 27/7/2021), drim òr (27/07), ală kuang bàng đơng lam, kuang đơng lam Đảng, Dà lơgar, Mặt trận dà lơgar Việt Nam lài do neh tus pơdơng bơkào, chu ñàng kah kơlôi ală cau ling khin cha jăk chài chơ̆t màng tàm anih kah kơlôi ală cau ling khin cha jăk chài (gùng Bắc Sơn – Hà Nội) mờ mŭt tàm gơlang còp ies ƀồc Chủ tịch Hồ Chí Minh.

Tus bal tơnkah geh Chủ tịch lơgar ồng Nguyễn Xuân Phúc; Thủ tướng Chính phủ ồng Phạm Minh Chính, Chủ tịch Quốc hội ồng Vương Đình Huệ; Chủ tịch Ủy ban Mặt trận dà lơgar Việt Nam ồng Đỗ Văn Chiến, ală kuang bàng đơng lam Đảng, kuang bàng đơng lam Đảng, Dà lơgar lài do; ală kuang bàng Ủy viên Bộ Chính trị, Bí thư Đảng dà lơgar, Phó Chủ tịch Quốc hội, Phó Thủ tướng Chính phủ mờ kuang đơng lam ală Bộ, gah lơh broă Dà lơgar.

Tàm anih kah kơlôi ală cau ling khin cha jăk chài chơ̆t màng tàm gùng Bắc Sơn, ală kuang bàng đơng lam Đảng, Dà lơgar neh tus pơđơng goàng bơkào, kah kơlôi ală cau ling khin cha jăk chài chơ̆t màng; tơlĭk nùs nhơm pơrlai uă ngan tus mờ ală cau jăk chài dà lơgar dê neh ờ pơrlai poăc să, khin cha tam lơh, phi să tài broă tam lơh tơnklàs, dà lơgar tơrgùm bal, tài bơta krơi is, khăt gơboh bơh Dà lơgar dê, tài bơta gơboh gơbài làng bol dê. Pơn jăt mờ hơ̆, ală kuang đơng lam Đảng, Dà lơgar neh tus pơdơng goàng bơkào, mŭt tàm gơlang còp ies Chủ tịch Hồ Chí Minh.

Cau mblàng Ndong Brawl