VOV4.K’ho - Di tơnkah 131 nam tờm ngai deh Chủ tịch Hồ Chí Minh (19/05), drim òr (18/05), Mpồl kuang bàng tàm Ban Chấp hành Đảng dà lơgar, Chủ tịch lơgar, Quốc hội, Chính phủ, Ủy ban Mặt trận Dà lơgar Việt Nam neh tus pơdơng goàng bơkào, mŭt tàm gơlang ies ƀồc Chủ tịch Hồ Chí Minh.

 Mpồl kuang bàng ala măt Đảng, Dà lơgar mŭt tàm gơlang ies, còp ƀồc Chủ tịch Hồ Chí Minh

Goàng bơkào bơh Mpồl kuang bàng geh jơnau cih “Rài rài kah ưn ngài Chủ tịch Hồ Chí Minh jăk chài”. Mpồl kuang bàng neh tơlĭk nùs nhơm gĭt ưn ngài uă ngan, kah tus mờ broă lơh dờng màng bơh Chủ tịch Hồ Chí Minh dê, kuang đơng lam jăk chài, cau pơgru kờñ gơboh Đảng mờ dà lơgar he dê. Neh phi să jơh rài kis ai broă tam dră tơnklàs dà lơgar tơrgùm bal, bơ̆t bơtàu dà lơgar Việt Nam khăt gơboh is, tơrgùm bal.

Pơn jăt mờ hơ̆, Mpồl kuang bàng neh tus pơdơng goàng bơkào, chu ñàng, kah kơlôi ală cau ling chơ̆t màng tềng jơnang kah kơlôi ală cau ling chơ̆t màng tàm gùng Bắc Sơn. Tàm nùs nhơm nền nòn, ală kuang bàng đơng lam kah tus ală cau jăk chài dà lơgar dê neh ờ ngòt pơlai să jan, khin cha jăk chài tam lơh phi să tài broă tơnkàs dà lơgar, tài bơta khăt gơboh krơi is Dà lơgar, tài bơta gơboh gơbài làng bol dê.

Cau mblàng Ndong Brawl