VOV4.K’ho- Mho mờ mang ngai 18/11, Ủy viên Ban chấp hành Đảng Dà lơgar, Kuang gơnoar cih Quốc hội dê, Kuang ătbồ Cơldŭ lơh broă Quốc hội ồng Bùi Văn Cường neh bal mờ mpồl lơh broă tus bal Ngai chờ Tam klăc dờng jơh gùt jơi bơtiàn mờ làng bol jơi bơtiàn: Bahnar, ƀòn Đăk Wớt Yốp, xã Hơ Moong, kơnhoàl Sa Thầy mờ lơh broă mờ Tỉnh ủy Kon Tum.

Kuang gơnoar cih Quốc hội ồng Bùi Văn Cường pà phan ai ală hìu bơnhă làng bol kal ke in

Đơs tàm dơ̆ tìp măt, Kuang gơnoar cih Quốc hội ồng Bùi Văn Cường kơ̆p kờñ làng bol pơn jăt tai đòm jăt nùs nhơm tam klăc bal dùl nùs bal lơh jăt niam ală dơ̆ hòi jà mờ srơh tàm pơrlòng kờñ gơboh dà lơgar nàng bal mờ gơ̆p dong kờl bơtàu tơnguh lơh sa bơtàu tơnguh rài kis. Tàm dơ̆ lơh broă mờ Tỉnh ủy Kon Tum, ồng Bùi Văn Cường tơlik nùs nhơm tơngŏ bơta chờ hờp tềng đăp bơta tam gơl niam ngan bè lơh sa, niam chài, mpồl bơtiàn bơh càr Kon Tum dê tơngai rềp ndo. Bơta do tơngŏ loh tàm nùs nhơm chờ hờp bơh Ngai chờ Tam klăc dờng jơh gùt jơi bơtiàn dê gam geh bơyai lơh tàm làm gùt ală thôn, ƀòn tàm càr. Kuang gơnoar cih Quốc hội ồng Bùi Văn Cường jàu pà càr Kon Tum in dùl tơmàn đong dong kờl càr lam lơh broă lơh rơcăng sơndră kòp Covid-19 mờ pà 5 nơm hìu Tam klăc dờng bal mờ kờp jơh priă là 250 tơlak đong.

Cau mblàng Lơ Mu K’Yến