VOV4.K’ho- Mho ngai 29/10, tàm hìu lơh broă Chính phủ, Bí thư Đảng dà lơgar, Phó Thủ tướng ồng Lê Minh Khái neh wă Bộ trưởng Bộ zờu lơgar Kuwait gam geh dơ̆ lòt còp mờ lơh broă tàm lơgar he. Phó Thủ tướng ồng Lê Minh Khái pà git, tŭ do, kòp Covid-19 tàm lơgar Việt Nam neh geh sền gròi niam rlau. Việt Nam neh hời rơ hời pờ mpồng wơl, lam lơh broă rơndap lơh “gơ dờp ờdo ờdă, ngac ngar, gròi sền geh cồng nha kòp Covid-19”.

Phó Thủ tướng ưn ngài bơta dong kờl sơnơm vaccine rơcang sơndră kòp Covid-19 bơh Thủ tướng Chính phủ Kuwait dê gơ wèt tus mờ Việt Nam mờ đơs là, bơta do geh pơgồp bơnah dong Việt Nam mhar rê wơl mờ rài kis bè ờs pa. Tam pà mờ Việt Nam bè ală kal ke tài bơh kòp Covid-19 lơh gơbàn, Bộ trưởng Bộ zờu lơgar Kuwait pà git, di tŭ do, Thủ tướng Kuwait neh geh kơrnuat dong kờl Việt Nam 500 rbô ding sơnơm vaccine rơcang sơndră kòp Covid-19, bal mờ hơ̆ Chính phủ Kuwait kung sền sơ wì nàng pơn jat tai dong kờl Việt Nam tàm broă rơcang sơndră kòp bơtờp.

Cau mblàng K’Duẩn